Tura, Naitung 05: U Bishop Emeritus George Mamalassery, jong ka Balang Catholic ula khlad noh hynne ka sngi thohdieng ha ka rta kaba 92 snem ha Holy Cross Hospital, Tura.
U Bishop George Mamalassery ula trei met bad mynsiem bad noh synniang ha kaban shakri ia ka Roman Catholic Church bad ia ka imlang sahlang ha Tura, ia kaba ula shakri kum u Bishop uba nyngkongeh haduh 28 snem (1979-2007).
U Myntri Rangbah ka jylla u Conrad K Sangma ula pynpaw ia ka jingsngewsih halor ka jingkhlad noh jongu Bishop George Mamalassery.
“Ka jingtrei met bad mynsiem ban shakri ia u Blei bad ka jingiengskhem ka jongu ha kaban shakri ia ki parabriew kan long kaei kaei kaba ym lah ban klet shuh. Ki kam kiba la trei shitrhem da u Bishop kin kylla long kiba ai mynsiem lang ia ngi baroh” la pynpaw u Conrad ha ka rynsan Social Media.
Nalor kane ula phah ruh iaka jingsngewlem sha ki bahaiing bahasem, ki paralok parajor bad ia ki riewngeit Khristan ha kylleng ka jylla Meghalaya bad shabar ruh kumjuh.
La kha ia u Bishop George Mamalassery ha Kerala ha u snem 1932 bad ula duh noh ia la ki kmie ki kpa ha ka rta kaba u dang rit bha hynrei watla ula mad ia kiba bun ki jingtynjuh ula jam shaphrang sha ka jingshah khot ban shakri ha ka kam balang bad ula pyndep ia ka jingpule ka jongu bad ula shah pynskhem kum u nongshari balang ha ka 24 tarik u Iaiong 1960.
Da ka jingdon ia ka mynsiem ban shakri, ula mih shakhmat ha kaban leit trei ha ki thain nongkyndong bad ki jaka kiba shitom ha rilum Garo. Ula noh synniang iala ka jingim na ka bynta ban kyntiew iaka jingim jong ki trai shnong bad ula ai jingkyrshan bad jaka sah ha ka por ba mih ki jingeh bad ki jingtynjuh.
Ula trei khlem shongthait bad la ioh iaka sap nongialam ha u ha ka por ba ula shah pynkhamti kum u Bishop Banyngkong jongka Tura ha u snem 1979 ha ka rta kaba 46 snem. Hadien ba ula shakri kum u Assistant Parish Priest ha Tura bad Baghmara hadien ka 10 snem ula long ruh u Parish Priest ka ha u snem 1970.
Ha ka por ba kala don ka thma ha ri Bangladesh ha u snem 1971 ula ai jaka sah, ka bam bad kyrshan ia ki briew kiba la phetwir hapoh jong ka Parish. Ha ka 8 tarik u Rymphang 1979, u Fr George Mamalassery ula shha thung kum u Bishop ka Tura bad la pynskhem ia katei ka jingshimti ia ka kam ha ka 18 tarik u Lber 1979.
Kum u Bishop, ula pyniar ia ki 14 tylli ki Center kiba la don lypa bad pynkha haduh 23 tylli ki Parish kiba thymmai bad ula shimkhia ruh ha kaban tei ia ki ïingmane, Convent, Dispensary, Hostels bad ki skul bad ula iawer ruh ia ki Salesians bad Jesuits ban tei ia ki college ha Tura bad Williamnagar.
U Bishop Mamalassery ula tei haduh 34 tylli ki Dispensary ha kylleng jong ka rilum Garo bad ula seng ruh ia ka Holy Cross Hospital kaba 150 jingthiah haTura ha u snem 1993. Ula seng ia ka Rino Simonetti School of Nursing ha Tura bad ula iawer ia ka Montfort Brothers ban tei ia ka Montfort Centre naka bynta kito kiba don jingduna ha ki dkhot met bad ula shimkhia bha na ka bynta ban seng ia ka Bakdil, kaba dei ka kynhun trei mon sngewbha jong ka Diocesan.
Hadien ba ula shongthait noh ha u snem 2007, u Bishop George ula bteng ban shakri ia ka Diocese na ka Priest Home. Ka sorkar Meghalaya kala ai burom ia u da ka khusnam Pa Togan Sangma Award. Ula ioh ruh ia ka Honorary Doctorate ha u snem 2019 na ka University of Science and Technology, Meghalaya (USTM), halor ka jingnoh synniang ka jongu ha ka liang ka pule puthi, ka koit ka khiah bad ki kam pynroi ha ka imlang sahlang.
