Nongpoh Nailur 22: Kawei ka longkmie kala kha ia I khun hapoh ka painkhana jong ka Civil Hospital, Nongpoh Ri Bhoi District bad itei I khunlung ila khlad noh.
Kane ka longkmie kaba la kha khun hapoh ka painkhana, la tip kum ka kong Monaliza Langi kaba shong ba sah ha ka shnong Umden Diwon, ha ka janmiet jong ka Sngi U Blei, ha ka por 6 baje janmiet, katba ka dang leit painkhana namar ka jingsuh palat ka kpoh kala leit kha ia i khun hynrei ine i khunlung ila khlad noh.
U bah Richard Rympei u kurim jongka Kong Monaliza, ula iathuh ba ha ka miet sngi saitjain haba ka kurim ka jongu kala sdang suh, kumta la pynkit noh ia ka sha PHC Umden hynrei ki Doctor kila bthah ba dei ban rah noh ia ka sha Civil Hospital, Nongpoh.
Ula ïathuh ba ki Doctor kila kyntait ban ai ïa ka Ambulance naba kam dei ka kyrkieh ne ka emergency case bad kumta kila pynkit noh ia katei ka longkmie da ka kali jong u paralok bad ha ka por 1 baje shiteng mynstep ei ei kila poi ha Civil Hospital Nongpoh hynrei kim shym la lap ia kino kino ki briew kiba ap ha Civil Hospital bad kila hap ban shong habar bad kila ïoh ban rung pat shapoh haduh ha ka por 3 baje mynstep.
U Bah Richard ula ïathuh ba hynne ka Sngi U Blei ha ka por 4 shiteng eiei, ka kurim jongu kala sdang ban khie suh biang hynrei ki Nurse kila shu ai tang uwei u dawai kuli bad ha ka por 6 baje eiei, ka kurim ka jongu kala sdang ban suh biang bad kumta kala khie na jingthiah ban leit sha painkhana hynrei namar ka jingphlei palat ka snam palat, kala kha syndon ïa i khyllung hapoh katei ka painkhana bad i tei i khyllung i ba la kha i la khlad syndon.
Une u rangbah ula ujor ïa katei ka jingjia bad na ka liang ka Seng HITO kila leit sha Civil Hospital Nongpoh ban leit tuklar halor katei ka jingjia kaba sngewsih.
