Shillong, Nailur 17 : Kawei ka Nongtrei Mid Level Health Provider (MLHP) kala khlad noh namar ka jingpang rabies ha ka sngi Nyngkong hadien ka jingshah dait ha u ksew shang surok arbnai mynshuwa.
Haba pynthikna ia kane ka jingjia ha ka sngi Ba-ar, ka Myntri ka koit ka khiah kong Ampareen Lyngdoh kala pyntip ba kane ka MLHP ka dei kaba la tip kyrteng ka kong Gracetyfull Marngar ba 32 snem na West Khasi Hills.
“Hynnin ngi la duh noh ia kawei na ki nongtrei MLHP jong ngi. Kala shah dait ha u ksew ar bnai mynshuwa bad ym tip na kaei ka daw, I khlem leit ai injek anti-rabies” kala ong haba pyntip ba I Kong Marngar I dei iba trei hapoh ka Tynghor Sub-Centre.
Hadien kane ka jingjia, ka Myntri kala ong “Nga sngewsih jur bad khuslai bha….ngin sa tyrwa mynta ban buh noh ia ki dawai injek anti-rabies ha ki sub centre ruh kumjuh”.
