Kohima, Naiwieng 24 :Hapdeng ka jingiakynad ha khappud ka Assam bad Meghalaya, ka jingiakynad kala khie ha ki bynta khappud ka Assam bad ka Nagaland hynnin ka sngi Balang hadien ba ki bor pulit ka Nagaland kila leit ban pynpra ia kiba bun ki iing ki sem bad ki dukan ha ki jaka khappud kiba hap hapoh ka jingpeit jingkhmih jong ka Assam.
Katkum ki khubor na ka liang ki trai shnong kila kam ba kane ka jingwan pynpra ka dei kaba la leh da ki bor pulit ka Nagaland ha ki bynta jong ka Bihubar kaba hapoh Nazira ka Assam bad kaba la wanrah ka jingshah pynjulor jong kiba bun tylli ki iing ki sem.
Hadien jong kane ka jingwan pynpra kala mih ruh ka jingsyier na ka jingiakynad ha katei ka thain.
Lah ban kdew ba ha ka 22 tarik mynta u bnai ka jingiakynad kaba jur kala khie ha ki bynta jong ka West Karbi Anglong, kata hadien ba ki bor pulit ka Assam bad ka kynhun ki heh ka tnat forest kila jam sha u pud u sam jong ka Meghalaya ban beh thong ia ka trok kaba kit dieng beain hadien ba la lapdien da ki nongap khlaw.
Hadien kane ka jingbeh thong, katei ka kynhun pahara kala rung hapoh ka shnong Mukroh, West Jaintia Hills ha Meghalaya bad kaba ha khappud bad ka Karbi Anglong district ka Assam.
Shibun bah ki paidbah la kynnoh ba kila khynra ia ki bor pulit da kaba rah da ki tiar pynmynsaw hala ki jong ki kti kaba hadien na ka liang ki pulit la kynnoh ba kila ther kuli ban iada ia lade bad kaba la wanrah ia ka jingiap jong ki hynriew ngut ki briew kaba kynthup ia u nong ap khlaw ka Assam.
Kane ka jingjia kala wanrah ka jingkhih bitar hapdeng ki nongshong shnong ka Meghalaya.
Na ka liang u Myntri Rangbah (CM) ka Meghalaya ruh ula pynrem jur ia kane ka jingleh jong ki pulit ka Assam kumjuh ki pulit khlaw jong ka bad shim ruh ia baroh ki sienjam ban pynioh ia ka jingbishar hok bad ban pynshitom pyrshah ia kito kiba donkti ha katei ka kam pyntriem.
