Guwahati, Nohprah 10 :Ha kawei pat ka jingiakajia pud hapdeng ki ar jylla, ki nongshong shnong ka Narayanpur kaba hapoh Lakhimpur district hajan khappud ka Assam bad ka Arunachal Pradesh kila leh ia ka kam thombor da kaba pynpra ia u mawnongrim na ka bynta ka jingtei ia ka projek kam pynroi (Amrit Sarovar) ha Narayanpur.
Katkum ki khubor la ong ba kine ki riew pyntriem napoh Arunachal Pradesh kila wan sha katei ka jaka bad pynpra ia utei u mawnongrim.Lah ban kdew ba ia une u mawnongrim na ka bynta ka jingpyntrei ia katei ka projek la wan buh da u MLA ka Bihpuria u Amiya Kumar Bhuyan dang ha kine ki khyndiat sngi ba la dep.Katei ka jingjia la ong ba kala pynklumar jingmut bad pynher syrngiew ia ki nongshong shnong.
Lah ban kdew ba haduh kumba 45 akar ka jaka ha ki bynta jong ka Tramjuli Gorubandha ki dei kiba hap hapoh Narayanpur revenue circle ia kiba ka sorkar Assam ka thmu ban pyntrei ia ka project Amrit Sarovar.
Katkum ki tyllong khubor la ong ba katto katne ki briew napoh Arunachal kila wan sha katei ka jaka ba thmu ban pyntrei ia katei ka projek bad pynjulor noh ia u mawnongrim ba la pynieng ha kane ka jaka.
Kan ka jingjia kala wanrah ka jingkhihwin hapdeng ki nongshong shnong kiba don ha kine ki thain khappud.Ki trai shnong na ka liang ka Assam kila dawa ban pynshitom da kaba tyngeh pyrshah ia kitei ki runar bad pynpaw ruh ba ka jingtei da uwei pat u mawnongrim kala bteng bad la lah ban pyndep noh mardor.
Kham hashwa, kata ha u bnai Kyllalyngkot 2022, ka jingiakynad kala khie ha ki bynta khappud ka Assam bad ka Arunachal hapoh Dhemaji district ka Assam hadien ba kala mih ka jingialeh markylliang hapdeng ki nongshong shnong na ki arliang khappud ha kaba iadei bad ka jingpyntrei ia ka lynti surok lyngba ka skhim PMGSY.
Ki heh sorkar kila ong hadien ba ki trai shnong na Assam kila pynpaw pyrshah halor ka jingpyntrei ia ka surok da u kontraktor na ka sorkar Arunachal Pradesh, na ka liang une u kontraktor ula siat shi kuli sha suin.
Kane ka jingiakynad kaba thymmai kala wan jia ruh tang ar sngi hadien ba ki Myntri Rangbah (CM) jong kine ki ar jylla kila shim ia ka rai ban pynlong ka jingleit jurip ia ki jaka khappud da ka jingthmu ban lah ban weng noh shisyndon ia kine ki jingeh kiba iadei bad ki kam iakajia pud.
