Agartala, Nailur 06 : Ka jingiakynad kala khie ha ki bynta jong ka iew Nalchar hapoh Sepahijala district ka Tripura hadien ba kala mih ka jingiakhluit hapdeng ki nongtrei ka CPI (M) bad ki nongkyrshan ka BJP hynnin ka sngi Nyngkong.
Na ka liang ki nongialam ka CPI (M) kila kynnoh ba ki riew runar ba la kyrshan da ka BJP kila kren kynthoh bad ther maw ia ki nongtrei ka party katba ka jingiaid rally ka dang jam lyngba ia ka ophis ka party ha ki bynta jong ka iew Nalchar.
Ki trai shnong kila ong ba hadien ka jingsangeh kaba 54 bnai, ka CPI (M) kala pyrshang ban pynpaw iala ka jong ka bor da kaba pynlong ia ka rally kaba heh.
Artylli ki rally na la ki jong ki jaka kila pyniasoh lang ha ka jaka iew ba kongsan. Hynrei na ka liang ki bor pulit kila khanglad ia kine ki paidbah ba kin tur shakhmat da kaba kdew halor ki kam shongshngain.
Katba ki nongtrei ka CPI (M) ki dang bunkam ha kaba ia pynphai nia bad ki bor pulit, ki runar ia kiba la kynnoh ki nongkyrshan ka BJP kila leh ia ki kam thombor pyrshah ia ki nongtrei jong ka party.
Ka jinglong jingman kala nang kham khihwin shuh shuh hadien ba baroh arliang kila sdang ban ia ther maw markylliang.Na ka liang ki bor pulit kila pulom ban tehlakam ia ka jinglong jingman hadien ba ki nongkyrshan ka CPI (M) bad ka BJP kila ia ther markylliang hapoh kane ka jaka iew.
Kham hadien la lah ban tehlakam ia ka jinglong jingman ha ka jingtuklar jong ki pulit, kata hadien ba la lah ban pynpra ia ki paidbah na kane ka jaka.
Na ka liang u Ratan Saha uba dei u Secretary ka CPI (M) ka Sonamura division ula kynthoh tyngeh ia ka seng BJP bad kynnoh ruh ia kane ka party synshar halor ki kam leh donbor.
U Myntri sorkar barim uba dei ruh u MLA ka CPI (M) u Sahid Chowdhury ula ong “Bun ngut ki nongtrei ka CPI(M) kila ngat ha ki jingmynsaw na katei ka jingshah thombor. Laingut na ki la hap ban pynkit shapoh Melaghar hospital na ka bynta ban ioh jingsumar.Ka party kala ujor da ka FIR hapoh Nalchar police station”.
