Guwahati, Risaw 05 : Iwei I Khunlung ba dang shukha, ia iba la pynbna iap da ki doktor ha ka hospital shimet, ila khie im biang hashuwa ban thang ia ka metiap ha ka step sngi Balang.
Kane ka jingjia ba khyllah kala jia hapoh Silchar District ka Assam.
Tang mar syn jia kane ka jingjia, ka kynhujn ki briew na Malinibil Silchar, kila ialum paidbah hakhmat ka Hospital bad kila pynlong ia ka jingiakhih pyrshah ia ki bor pyniaid jong ka hospital.
Haba iakren bad ki nongthoh khubor, u Ratan Das, Kpa jong ine I Khunlung ula ong “Nga ialam ia ka Kurim kaba la pun hynriew bnai ia I Khun ha kpoh, sha ka hospital ha Silchar ha ka janmiet sngi Ba-ar ha kaba ki Doktor kila pyntip ba ki don ki jingeh ha kane ka jingpunkhun bad ki kwah ban iada ia ka Kmie lane ia I Khunlung na ka jingiap”.
“Ngi la shah ia ki ban pynkha ia I Khun bad kila ong b aka Kurim jong nga kala kha ia I Khun bala iap. Ha ka step sngi Balang, ka Hospital kala aiti ia ka metiap jong ine I Khunlung” ula iathuh.
U Das u ong “Ngi la ioh ia ka metiap ha ka song. Hadien ba ngi poi ha jaka thang metiap ha Silchar bad katba ngi dang plie ia ka song shuwa ka jingleh niam khatduh, I khunlung ila iam. Ngi la mareh biang sha hospital bad mynta ine Khunlung I don hapdeng ka jingsumar”.
Ha kajuh ka por, ki bahaiing hasem kila ujor da ka ejahar pyrshah ia ka hospital bad ia u doktor ba pynbna iap. Ki nongshongshnong ki ong ba u doktor ula dei ban examin bha ia I khunlung hashuwa ban pynbna iap.
“Ki buh ia ki khunlung ba dang sah ha song la kum u niut da ki kynta khlem da examin bha ba I dang im” ula ong.
Ha kawei ka liang, ki bor pyniaid ka hospital kila ong ba kila buh ia ine I Khunlung ha ka jaka khmih kyrpang haduh phra kynta hashuwa ban pynbna ba ila iap.
