Guwahati, Risaw 05 : Shi snem hadien ka thma iakynad pud kaba jur hapdeng ka Assam bad ka Mizoram kaba la shim ia ka jingim jong ki hynniew ngut ki briew, sa shisien pat ka jingiakynad kaba khie biang ha ka thain khappud jong kine ki ar jylla ha ka sngi U Blei ba la lah.
Na ka liang u heh pulit ka Mizoram ula kynnoh ba ki bor pulit ka Assam kila shna ia ki iingsah shipor kiba da ki siej ha ka jaka kaba don hapdeng ka jingiakynad hajan ka sor rit Bairabi hapoh Kolasib district kaba la pynmih ia ka jingiakynad ha kane ka jaka.
Ka Mizoram bad ka Assam ki iasam lang ia ka jaka khappud kaba 164.6 kilomitar bad la pynneh ia ka status quo watla kine ki artylli ki jylla ki dang iai bteng ban pynlong ia ka jingiakren da ka jingthmu ban lah ban pynkut noh shisyndon ia kane ka jingiakynad bud kaba la neh da ki phew snem.
Katkum u Superintendent of Police (SP) ka Kolasib u Vanlalfaka Ralte la ong ba ki pulit ka Assam kila pynieng ia ki artylli ki iingsher dara ba shipor ha ka jaka kaba don hapdeng ka jingiakynad, kata marpyrshah ka jaka rep kba jong u Myntri Rangbah (CM) ba nyngkong ka Mizoram u Ch. Chhunga.
Kane ka dei ruh ka juh ka thain khappud kaba hapdeng ka Kolasib district ka Mizoram bad ka Hailakandi district ka Assam kaba la pynmih ia katei ka jingiakynad kaba jur kaba la jia ha ka snem 2018.
Watla katta katkum u Ralte, na ka liang ki bor pulit ka Assam kila pynpra noh ia kitei ki artylli ki iingsher dara ha ka sngi Nyngkong ba la dep hadien ka jingkyrpad na ka liang ka sorkar Mizoram.
Na ka liang u Myntri Rangbah Zoramthanga bad u Myntri kam pohiing u Lalchamliana kila pynlong ka jingiamir jingmut halor kane ka jinglong jingman bad u CM bad Myntri kam pohiing ka Assam, ong shuh shuh utei u heh pulit.
