Shillong, K’Lyngkot 04: Ka All Assam Garo NGOs Forum hynne ka sngi ka la pynbna ban khein be-ain ia ka seng Garo Students’ Union (Assam State Zone) halor ka jingkynnoh ba ka kyrshan ia ka jingithuh Sixth Schedule ia ka Rabha Hasong Autonomous Council (RHAC).
Ha ka kyrwoh ka ka Forum ka la ong, “Halor kane ka jingleh shet kylla kaba sngewsih, ka jaidbynriew Garo baroh kawei, ryngkat bad baroh ki seng treimon sngewbha jong ki Garo jong ka Assam, da kawei ka jingmut ki la rai ban khang kaba tyngeh ia ka GSU (ASZ) ha Assam”.
“Kane ka jingleh kaba skhem ka pynpaw ïa ka jingkut jingmut jong ngi ïa ka daw kaba dei hok jong ngi bad ka jingkut jingmut kaba khlem sangeh jong ngi ban wad ïa ka hok na ka bynta ki jaitbynriew Garo. Ka rai lang jong ngi ban khang ïa ka GSU (ASZ) ka long ka jingpynshisha ïa ka jingïatylli bad ka jingkut jingmut jong ngi” la ong ka kyrwoh.
Ha kane ka Forum kaba kynthup ïa ka Garo Students Federation of Assam (GSFA), Garo Autonomous Council Demand Committee (GACDC), Garo National Council (GNC) Assam State Zone bad kiwei kiwei bad la ong ki jaidbynriew Garo kiba shong ba sah hapoh ka Rabha Hasong Autonomous Council (RHAC) ki la iakhun tyngeh ban ioh ia ka District Garo Autonomous Council ha Assam.
Kane ka long ban weng ïa ki shnong Garo na ka RHAC shwa ban ai ïa ka kyrdan RHAC Sixth Schedule.
Haba pynpaw ba ka jaidbynriew Garo ka la mad ïa ka jingshah shet kylla kaba shyrkhei, ka la kynnoh ba ka Seng ki Samla Pule Garo (Assam State Zone), ha ka sienjam kaba jylliew bha bad ka jingïakynad, ka la pynïahap ïalade bad ka Rabha Hasong Sixth Schedule Demand Committee (RHSSDC).
“Da kaba kyrshan ia ka jingai Sixth Schedule kaba la kynnoh ba ka dei na ka bynta ki jaitbynriew Garo, ka GSU (ASZ) ka la pynjah burom bad pyndem ia ki jingangnud bad ki jingmyntoi ba kongsan jong ki paidbah Garo jong ka Assam. Ka seng ki samla pule Garo (ASZ) ka la leh pyrshah ia ki jingangnud ba iatylli jong ki briew Garo da kaba pyniadei ia lade bad ki. Ka RHSSDC, ka GSU (ASZ) ka la shet kylla ia ki jingmyntoi ba kongsan jong ka imlang sahlang jong ngi, ka jingkyrshan jong ki ia ka Sixth Schedule na ka bynta ka RHAC, kaba la kynnoh ba ka dei na ka bynta ka imlang sahlang Garo, ka dei ka kam shet kylla kaba shyrkhei,” la ong ka kyrwoh.
“Ngi kwah ban pynshai ba ka jingpyrshah jong ngi kam dei pyrshah ia ka Garo Students’ Union, Central Executive Committee (CEC), GSU Nagaland lane GSU BTC (Assam)”.
Katkum ka jingïathuh jong ka Forum, ka jaidbynriew Garo jong ka Assam baroh kawei ka ieng pyrshah ïa ki kam ba kyrpang ba la leh da ka GSU (ASZ) ha kaba kyrshan ïa ka Sixth Schedule sha ka RHAC khlem da kynjoh ktien ïa ki jaidbynriew.
Ha ka 23 tarik Nohprah 2024, ki nongïalam ka GSU (ASZ) ki la pynmih ïa ka kyrwoh kaba la thew ïa u Pholince Sangma, Chairman ka UGACMC, Assam, halor ka jingkren bad jingkynnoh jong u pyrshah ïa ka GSU (ASZ) ha kaba ïadei bad ka jingkyrshan jong ki ïa ka RHSSDC bad ka jingïashim bynta jong ki ha ka jingïakhih ha Jantar Mantar, Delhi.
Halor kane, ka Forum ka la ong, “Ngi, ka All Assam Garo NGOs Forum, ngi pynrem khlem artatien ia ka jingleh jong ka GSU (ASZ) kaba kyrshan ia ka Sixth Schedule sha ka RHAC khlem kano kano ka jingiakren bad ki nongialam jaidbynriew Garo, ki seng treimon sngewbha, ki nongshim bynta, bad ka imlang sahlang. Ka ki kam jong ka GSU (ASZ) la leh khlem kano kano ka jingïamir jingmut ne jingmynjur na ki Garo bad kane ka pyni ia ka jingbym khein snep ia ki sur ba iatylli jong ngi.”
“Kane ka jingshet kylla jong ka GSU (ASZ) ka dei ka jingbymhok kaba khraw ia ki paid Garo, bad ngi ieng tylli ha ka jingiakhun jong ngi na ka bynta ka hok jong ngi bad ka lawei jong ngi. Ngim shah ia kino kino ki kam kiba pynduhjait ia ki jingangnud bad ki jingdawa ba dei hok jong ngi. Ka jaidbynriew Garo ka dang sah kaba skhem ha ka jingwad jong ngi ïa ka hok bad ka jingseng ïa ka Dorbar Garo kaba kyrpang,” la ong ka kyrwoh.
