Guwahati, Jymmang 29 : U Myntri Rangbah Duh ka Ri Narendra Modi hyne ka sngi Nyngkong, ula khaweh lama ia ka jingshakri jong ka rel Vande Bharat Express ba nyngkong eh jong ka thain Shatei Lam Mihngi kaba mih na Guwahati sha Jalpaiguri, West Bengal.
U Myntri Rangbah ula ai nam ruh ia ka 182 Km ka bynta bala pyndait bording sha ka Ri nalor ka jingplie paidbah ia ka DEMU/MEMU shed ba dang shu dep tei ha Lumding, Assam.
“Mynta ka pyrthei baroh kawei kala iakren halor ki jingtei kiba mih hapoh ka Ri India. Ka Vande Bharat kan iarap ym tang ban pynsted ia ki kam pyniasoh hynrei ban kyntiew ia ki kam jngohkai jong ka thain Shatei Lam Mihngi. Ki jingtei jong ka roi ka par ka dei ka jingleh hok ba shisha, ka dei ia baroh” ula ong.
U Modi ula ong “Phi lah ban mutdur ba ka rel ba iaid nyngkong eh ha India ka dei 150 snem mynshuwa. Hadien ka jingioh laitluid, ka thain Shatei Lam Mihngi kala dei ban iohi iaki jingpyniasoh lynti rel hynrei ym shym la la leh satia ia kane tad hadien ba ngi wan ma ngi ha ka bor ha u snem 2014. Ka Ri kala iohi ia bunbah ki jingkylla ha kine ki khyndai snem bad ka nuksa ba biang eh ka dei ka roi ka par kaba wan mynta ha ka thain Shatei Lam Mihngi”.
“Tang mynta u snem, ka Thain Shatei Lam Mihngi kala ioh haduh T. 10,000 klur ka mangtyngka ha ka lynti rel, kaba long saw shah ia ki snem bala leit. Shen, baroh ki Nongbah jong ki Jylla ka thain Shatei Lam Mihngi kin sa pyniasoh noh da ki lynti rel. Ki lynti rel kila don arshah kaba long haduh khyndai shah ka jingsted. Kiba bun ki jaka ha ka thain kila iasoh da ka lynti rel ha ka sien ba nyngkong eh” ula ong.
