Shillong, Naitung 20 : Shuwa ka jingsdang biang jong ka Dorbar Lyiur ka Iingdorbar Parliament, u Myntri Rangbah Duh ka Ri Narendra Modi ha ka sngi Palei, ula ang ia ka shyntur ha ka sien ba nyngkong eh halor ki kam iaumsnam ha Manipur bad ong ba yn ym map satia ia baroh ki briew kiba donkti ha ka jingpyniaid lyngkhuit bad leh tohmet ia ki Kynthei kat kumka video bala saphriang.
U PM Modi ula ong “…Nga kular ia ka Ri, baroh kiba donkti kin ym ioh jingmap. Ka ain kan shim iala ka jong ka lynti bad da baroh ka bor. Kaei kaba jia ia ki Khun Kynthei ka Manipur kan dei kabym lah map shuh”.
Ula kyntu ia baroh ki Myntri Rangbah jong ki Jylla ban ai jingiada ia baroh ki Kynthei la ka dei ha Rajasthan, Manipur ne ha Chattisgarh.
“Ngi dei ban ieng rasong palat ia ka kam sain pyrthei ban iada ia ki kynthei” ong u PM Modi.
#WATCH | Prime Minister Narendra Modi says, “…I assure the nation, no guilty will be spared. Law will take its course with all its might. What happened with the daughters of Manipur can never be forgiven.” pic.twitter.com/HhVf220iKV
— ANI (@ANI) July 20, 2023
Ka Video ba saphriang na Manipur
Ka video jong ki arngut ki Kynthei Kuki kiba shah pyniaid lyngkhuit ha surok ha ki paidbhur, kala saphriang ha ki rynsan jong ki social media.
Kat kum ka jingong ki Pulit ka Manipur, kane ka jingjia ka lah ban jia ha ka 4 tarik Jymmang, shisngi hadien ba khie ka jingia umsnam hapdeng ki Meitei bad ki Kuli ha Manipur, kaba sdang ha ka 3 tarik Jymmang.
Kila ong ruh ba kane ka jingjia kala jia ha ka Shnong B Phainal kaba hap hapoh ka Kangpokpi District. Kawei na kine ki kynthei kala shah leh beijot ha ki paidbhur bad kala don ka ejahar bala mudui halor kane ka jingjia.
Ha kane ka video, bun bah ki shynrang kiba dei ki Meitei kila pyniaid lyngkhuit ia kine ki arngut ki Kynthei katba ki dang ialam sha kawei ka lyngkha. Ha kane ka video, katto katne ngut ki shynrang kila jrong kti kti ia ka ijot jong kine ki kynthei.
Ha kajuh ka por, u Myntri kam Pohiing ka Ri Amit Shah ula kren ia u Myntri Rangbah ka Manipur N Biren Singh halor kane ka video ba shah leh donbor kine ki arngut ki Kynthei.
Pule lang ia kane: TMC :Ka Manipur kala iapait naka jingiapher jingbynriew, ym don plan ka Sorkar ban iarap ia ki phetwir
