Imphal, Naitung 20: Ka MP Rajya Sabha ka Trinamool Congress Sushmita Dev ha ka sngi Balang kala ong ba ka Manipur kaba la don hapdeng ka kam iaumsnam mynta la 78 sngi, kala pra phom ha ka jingiapher jaidbynriew bad la iohi b aka Sorkar Jylla kam I lah leh eiei halor kane ka kam.
Ki saw ngut ki MP ka TMC kiba la don ha Manipur, kila leit ban iuhkjat sha ki shnong ba bun ki paid riewlum-Churachanpur District bad iakren bad ki briew kiba la kylla phetwir bad shong riehtngen ha ki jaka sah ba shipor.
Kane ka kynhun ka TMC kala iakynduh ruh ia ki briew ba sah ha ki ktem shipor ha Imphal bad iakynduh ruh ia ka Lat ka Jylla Anusuiya Uikey ban iakren halor ka jinglong jingman ha kane ka Jylla riewlum.
Ka Sushmita Dev kala ong ba baroh ki briew jong ki jaid bynriew bapher bapher kila ngiah ia ka Sorkar Pdeng bad ka Sorkar Jylla namar kine ki Sorkar kim shym la leh eiei ban tehlakam ia ka jinglong jingman wat hapdeng ka jingdon haduh 60,000 ngut ki bor pahara ka Sorkar Pdeng ban tehlakam ia ka jingjia.
“Ka heh jong nga Mamata di (Myntri Rangbah ka West Bengal Mamata Banerjee) ka kwah ban wan iuhkjat ha Manipur ha u bnai Jylliew hynrei ka Tnad kam pohiing ka Jylla kam shym la mynjur. Ki paidbah ka Manipur kila bibat bha balei ba u Myntri Rangbah Duh Narendra Modi u dang sngap jar jar. Hadien ba ngi la wan sha Manipur bad sngap ia ka jingpynsngew ki paidbah, ngin sa rah iakren ia kane ka kam hapoh Parliament” ong ka Sushmita.
Kiwei pat ki dkhot jong kane ka Kynhun ki MP ka TMC ba don ha Manipur ki kynthup ia u MP ka Rajya Sabha Dola Sen bad ki MP ka Lok Sabha Kalyan Banerjee bad Kakoli Ghosh Dastidar.
