Shillong, Naiwieng 09 : U Lat ka Jylla hynne ka sngi Balang kala pynmih ia ka hukum ba khang ia ki Nongtrei jong ki Tnad ba khmih ia ki Emergency Service ne ki jingshakri ki bym lah ban pynsangeh, ba kin iakhih khnang ba kan nym don jingthut ka jingshakri ia ki paid nongshongshnong ka Jylla.
Kane ka hukum kala mih na u Commissioner & Secretary ka Tnad Bording ka Jylla u Pravin Bakshi halor ka jingioh khubor ba ki Nongtrei ka MeECL ki thmu ban pynlong ia ka jingiakhih.
Kat kum ka hukum la ong, “Haba pyntreikam ia ka bor bala pynkup daka sub section (1) of section 3 jong ka Meghalaya Essential Services Maintenance Act, 1980 (No.23 of 1980) pule lang bad ka Meghalaya Essential Services Maintenance (Amendment) Act 2003, u Lat ka Jylla u sngew dei ba na ka bynta ka bit ka biang ki paidbah, la khang ia ki jingsangeh treikam ha ki Tnad bym long ban pynduh ia ka jingshakri khnang ba kan nym don jingthut ia ka jingshakri sha ki paidbah”.
La pyntip ruh ba kane ka hukum kan treikam noh mardor bad kan treikam haduh hynriew bnai kynthih.
U Bakshi ula pyntip ba kane ka long ka hukum ha ka kyrteng jong u Lat ka Jylla.
