Shillong, Rymphang 19 : U Lamphang ka Iingdorbar Thaw Ain Thomas A Sangma ha ka Sngi Palei, ula kyntait ban pdiang ia ka jingbatai shimet jong u MLA ka VPP na Mawlai Bah Brightstarwell Marbaniang haba iadei bad ka jingbthei ka par dewiong ha Mynsngat-Thangsko da kaba ong ba kane ka kam ka long sub judice bad khang syndon ban iakren hapoh ka Iingdorbar.
U Lamphang ula pyntip ia ka Iingdorbar ba kane ka kam ka dei kaba la shimkhia da ka Tnad bad ba u Advocate General ula tyrwa ia ki jingai jingmut, kaba pynlong ia ka kum ka kam bym lah ban pynlong ia ka jingiatai.
“Kane ka kam ka long sub judice kumba pyntip da ka Tnad bad kumta ym shym la pdiang satia ia ka ban iatai. Nalor kata, u Advocate Genetal ula ai ia ki jingai jingmut halor kane ka kam bad kumta la khang ban iatai hapoh ka Iingdorbar” ula ong.
Shuwa kane, u Bah Marbaniang ula ieng kat kum ka Rule 282 ban pynshai ia ka nongrim jong u hadien ba kyntait ia ka notice ba ula ai ban iatai ia ka short duration motion hapoh ka Rule 50. Ka motion jong u ka kwah ban iakren ia ka jingbthei ka par dewiong ha East Jaintia Hills, kaba la pynmih ha ki lad pathai khubor.
“Ka notice jong nga kam dei satia tang ka kam leh sain pyrthei. Ka dei kaba la wanrah halor ka jingjia kaba sngewsih ha kaba 18 ngut ki briew, kiba bun ki dei ki nongkamai, kila duh ia ka jingim ha ka par beain. Haba kum kane ka jingduh ka wan jia, ki paidbah ki phai sha kane ka Iing ban ioh jubab” ula ong.
