Nongpoh, Naitung 23 : Ha ka sien kaba nyngkong, u trai jong kawei ka karkhana sain jri, ula pyneh triang ban pyrshah ia ka jingwan khynra kot jong ki Nongialam bad dkhot ka Hynniewtrep Youth Council (HYC)-Ri-Bhoi, kaba lam sha ka jingiania kaba jur bad ka ingiatied miej.
Une u trai karkhana u dei u Joginder Pal Kapoor jong ka karkhana sain jri bala tip kyrteng ka Resources Rubber Pvt Ltd, kaba don ha shnong Mawlai.
Ka seng HYC kala hiar leit khynra ia ki kot ki sla jong kane ka karkhana ha ka sngi Nyngkong, halor ka jingkynnoh ba kane ka karkhana kala pynkhein ia ki ain ki kanun jong ka Jylla bad jong ka Khasi Hills Autonomous District Council (KHADC).
Hynrei la ong ba u trai ka karkhana Joginder Pal Kapoor ula pyneh triang ban pyrshah ia kane ka jingkhynra bad kyntait ruh ban sei ia ki kot ki sla da kaba ieng ha ka nongrim ba u Superintendent of Police (SP) ka Ri-Bhoi, ula bthah ba um dei ban aiti ia ki kot ki sla lada don ba wan khynra lait na ki bor ka Sorkar Jylla.
U Joginder ula pyneh ban pyni ia ki kot ki sla da kaba ong ba ka seng HYC kam don hok ban shu wan khynra kot khynra sla khlem ka jingbit na ki bor ba halor.
Namar kane ka jingjia, ka HYC-Ri-Bhoi District kala khang tala syndon ia katei ka karkhana ryngkat ka maham tyngeh ia ki nongtrei ba lada ki plie lane pynpait ia ka tala bala khang da ka seng khlem da pynbiang shuwa ia ki kot ki sla, ka seng kan sa wan hiar biang ban kan leh da ki kam kiba kham tyngeh.
Haba kren sha ki lad pathai khubor, u General Secretary ka HYC-Ri-Bhoi Tonny Shylla ula ong ba kane ka jingkhynra ka dei kaba la pynlonghalor ka jingioh jingtip ba kane ka karkhana kala treikam beain. Ula ong baka Trading Licence jong kane ka karkhana kala kut la shisnem eiei hynrei ka khlem pynthymmai shuh ia ka.
U samla Tonny ula ong ba ki nongialam ka Seng kila leit ban iakren da kaba jai jai hynrei sngewsih ba u trai ka karkhana ula pyni bor bad jan kynrup ruh ia ki dkhot. U ong ba kane hi ka pyni ba une u bar jylla um khein kor bad burom ia ka seng.
U Trai ka jaka Bah Donald Rymbai u iathuh ba ula aiti ia ka jaka sha katei ka karkhana naduh u snem 2022 hynrei la kynnoh ba une u trai karkhana u khlem pat siew ia ka bai jaka haduh mynta.
U pyntip ba ula dep ujor ia kane sha ki bor pyniaid District naduh u snem bala leit noh hynrei la kynnoh ba haduh mynta, ym shym la don mano manor uh ba shimkhia na ka liang ka Ophis u Deputy Commissioner.
-Ri-Bhoi, kaba lam sha ka jingiania kaba jur bad ka ingiatied miej.){kind=link}