Shillong, K’lyngkot 05 : Ka Deputy Commissioner ka East Khasi Hills, kala pynmih ia ka hukum ba pynjari da ka kyndon 144 CrPC kaba khang pyrshah ban tih par maw bad khlong syiap na ki wah kiba don hapoh ka District khlem da ioh Mining Licence /Quarry Permit na ki bor ba dei khmih.
Kat kum ka hukum, ka DC kala pyntip ba ka Ophis kala ioh jingtip ba ka don ka jingtih par maw bad khlong shyiap be-ain na ki Wah ha kylleng ki jaka ka East Khasi Hills khamtam ha ki thain Sohiong, Mawblei bad Umphyrnai, kiba la ktah jur ia ki tyllong um, ki jaka rep bad ki sawdong sawkun.
Ka pyntip ba ka Ophis kala ioh ruh ia ka hukum na ka National Green Tribunal (NGT) New Delhi, kaba khang ia ki briew/kompani/ne kino kino ki bor ba kin tih par ne khlong syiap na ki Wah ha kylleng ka Ri khlem da ioh ia ka Mining Licence/Quarry Permit bad kiwei kiwei ki jingbit bala buh da ka Ministry of Environment, Forest and Climate Change ka Sorkar India.
Namar kane, ka DC ka pyntip bala pynjari ia kane ka hukum ka ban treikam mardor ha baroh kawei ka District tad haduh da pynmih da kawei pat ka hukum.
