Shillong, K’lyngkot 19 : Ki bor District ka East Khasi Hills, kila khang lynti ia u MLA ka Mawlai Brightstarwell Marbaniang lem bad 2 ngut ki Nongialam ka Liang Pyrshah Voice of the People Party (VPP), kiba dang thmu ban leit shong kyllain mungor hajan Secretariat.
Ia une u MLA bad ki Nongialam ka VPP la khang da ki Pulit bad ka Magistrate ha Kashari Point katba ki dang iaid lynti ban leit sha ka jaka bala pynbna ban shong kyllain mungor.
Ka VPP kala pynbna ban shong kyllain mungor mynta ka step hajan Secretariat, ban pynbor ia ka Sorkar Jylla ba kan thung kam biang ia ki Ophisar bala shah weng kam jong ka Lokayukta. Kine ki Ophisar ba shah weng kam ki dei ki Ophisar bala shongthait jong ka Sorkar Jylla.
Ka Deputy Commissioner ka East Khasi Hills kala phah ia ka shithi sha ka VPP ba kyrpad ban nym pynlong ia ka jingiakhih namar ka jingdon ka jingialang jong ka NEC ba pyniaid da u Myntri kam Pohiing ka Ri u Amit Shah.
Kala pynkynmaw ruh ia ka jingtreikam jong ka kynhun 144 CRPC ba khang ban ialum paidbah, iakhih ha ki jaka ba jngai 200 meter na Secretariat, Additional Secretariat bad Raj Bhavan.
Ka Sorkar jylla kala dep pynshai ba ka jingthung bad jingweng kam ia ki dkhot ka Lokayukta ka shong ha u Lokayukta bad ba ka Sorkar kam don bynta eieie hynrei tang ka jingphah ia ki kyrteng sha u Lokayukta ba un shim rai.
Ka Sorkar kala pynshai ruh b aka Lokayukta Act kam shah satia ia ki Ophisar bala shongthait ban bat kam ne long ki dkhot jong ka Lokayukta bad dei namar kane ka daw, ba la weng kam noh ia kine ki Ophisar bala shongthait ban thung bujli da ki ba dang don ha ka kam (service).
Hynrei wat hapdeng kane ka jingpynshai, ka VPP kam shym la pynsngap satia bad ieng ha ka nongrim ba ka jingweng kam ka dei namar ba kine ki Ophisar ki dei kiba khyllie ia ki kam bamsap hapoh GHADC.
