Imphal, K’lyngkot 19 : Ki kam iaumsnam kila sdang saphriang biang ha kylleng ki District ka Jylla Manipur bad tang ha kine ki 48 kynta bala leit noh, haduh 7 ngut ki briew kila shah pyniap ha ki kynhun kaikhlaw ha Bishnapur District.
Sa 4 ngut ki briew kila shah pyniap biang hynnin ka sngi Palei ha ki kynhun kaikhlaw ha Bishnapur District, pyntip ki bor Pulit ka Manipur.
Kane ka jingpyniap kala jia ha Ningthoukhong Kha-Khunou, kaba jngai kumba 42 km na Imphal. Kine kiba shah pyniap ki kyrteng u Thiyam Somen Singh (50), Ningthoujam Nabadip Meitei (38), Oinam Bamoljao Singh (63) bad u Khun Oinam Manitomba Singh (32). Kine baroh ki dei ki nongshongshnong ka Ward-4 ha Ningthoukhong Kha-Khunou.
Kane ka jingjia kala jia tang shisngi hadien ba arngut ki Pulit Commando kila kyllon iap ha ka jingiather kuli bad ki kaikhlaw Kuki ha sor Moreh. Ha kane ka jingjia, uwei u nongshongshnong ula kyllon iap na ka jingshei kuli kaba jia hynnin ka step. Kine ki pulit Commando ki kyrteng u Takhellambam Saileshwore bad Wangkhem Somorjit Meitei.
Ha kajuh ka por, ka jingiakhih ki paidbah ka dang iai bteng ha Imphal bad ki jaka ba marjan halor ka jinglong jingman ka suk ka sain ha katto katne ki jaka ka Manipur, kaba la mih na ka jingiap ki arngut ki Pulit ha Moreh, Tengnoupal District.
Ki Nongiakhih kila dawa ruh ban weng kam noh ia u Kuldeep Singh, u Director General barim ka CRPF uba dei khmih ia ka Inter Agency Unified Command bad shah thung kum u Security Adviser ka Sorkar Jylla ha u Jylliew 2023.
