Shillong, Nohprah 06 : Ka jingialang bala pynlong da u MLA ka BJP na South Shillong Bah Sanbor Shullai ha ka sngi Thohdieng, kala rai ban dawa khang lut ia baroh ki khappud bad pynjur ia ka jingkhynra ia ki kali ha ki artylli ki Entry Point-Byrnihat ha Ri-Bhoi bad Ratacherra ha East Jaintia Hills, ban pynkut ia ka jingpynrung ia u droks sha Jylla Meghalaya.
Kane ka jingialang bad ki nongshongshnong ka thain Municipal kala rai ruh ban pynjur ia ka jingiaid pahara miet hala ki jong ki shnong ki thaw hadien ba jur ki kam tuh kam thiem kiba la pyntip na kylleng ki jaka jong ka nongbah Shillong.
Haba kren ha ki nongthoh khubor hadien ka jingialang, u Bah Sanbor ula ong “Ngi la ai jingmut ba ngi donkam ban talasi wat lada dei ki kali jong u Myntri Rangbah ka Jylla ne Myntri Rangbah Duh ka Ri ne MLA lane ki nongkhaii lane ki kali shimet bad kali kamai. Lada ngi iai bteng ban khynra shisnem lynter, nga ngeit bad kyrmen ba ngin lah pynduh ia u droks ha ka Jylla jong ngi”.
U pyntip ba ia kane ka mat la pynsngew ruh ha ka jingialang ba khatduh jong ka MDA bad la ai ia ki jingai jingmut sha u Myntri Rangbah Conrad K Sangma, Symbud Myntri Rangbah ba khmih ia ka kam pohiing Bah Prestone Tynsong lem bad sha u Myntri ka Tnad Social Welfare Bah Paul Lyngdoh.
“Ka kam ba kongsan kaba ka Sorkar ka hap ban leh ka long ba ngin pynieng ia ki checkgate ban khang ia baroh ki jaka rung bad jaka mih kiba wan na Byrnihat bad Jaintia Hills namar ngi tip ba ia u droks la shalan lyngba ka Assam bad u dei uba wan ba Manipur, Myanmar. Katba ngim pat khang ia baroh ki jaka rung jaka mih, ngin ym lah ban leh eiei halor kane ka kam” ula pynsngew.
Haba kylli halor ka jingkynnoh donkti ki riew bat ain bad ki nongkhaii droks, u Bah Sanbor ula ong “Ta ka daw nga la kyntu ia ki Pulit jong ngi bad baroh ki kyndon, ba ngi dei ban trei hok ia ka kam. Ka jingtreihok ka dei ban don ba ngin lah ban pynduh jait ia u droks ha ka Jylla”.
“Wat ki shipai ruh la ioh kem bad u droks. Wat ki katto katne ki Pulit la ioh ban kem bad u droks. Kila donkti ha ki kam khaii droks. Ta ka daw nga kyntu ia ka Sorkar bad ia baroh ki Pulit ba ki dei ban trei hok ia ka kam” ula bynrap.
Haba pynpaw ba ka Sorkar kala shim ia ki sienjam ban leh eiei halor ka jingjyllei u droks tangba ula ong “Kam pat long satia kaba hun” bad bynrap “Ta ka daw nga la khot ia kane ka jingialang ban shim ia ki jingai jingmut na ki kynhun bapher bapher bad ngin sa phah ia ki rai sha u Myntri Rangbah, u DyCM bad sha u Myntri ka Social Welfare ba ngi dei ban shimkhia bha halor kane ka kam”.
Halor ka kam ban sumar ia ki nongkhaii droks, une u MLA ka BJP ula ong b aula hap ban ai jingiarap song pisa na ka MLA skhim bad tulop sha ki kmie kpa jong ki nongdih droks, kiba don hapdeng ki jingsumar ha ki rehabilitation centre namar ka jinglut jingsep ka dei kaba rem bha.
Ula ban jur ruh ia ka jingdonkam ban nang pynbun ia ki rehabilitation centre bad ong “U CM ula bthah ia ki Ophisar ba kin ithuh ia ki jaka ha New Shillong bad ha kiwei ki District ka Jylla bad hadien bala ioh ia ki jaka, ngin sa leit iakren ia u Amit Shah ban ai pisa ha kaban tei ia ki rehabilitation centre ki ban iarap shibun ia ki nongdih droks”.
Haba pynpaw ia ka jingsngewkhia halor ka jingkharoi ki kam tuh kam thiem ha Shillong, u Bah Sanbor ula ong “Kine ki bymman kim map satia wat ban kyndang ia ki jingkhang jong ki Iingmane”.
Ula kren ia kane haba kdew ia ka jingjia kaba jia hapoh ka Catholic Cathedral ha Laitumkhrah, ha Iingmane ka Balang Unitarian ha Laban bad ha Iingmane ka Balang Adventist.
“Namar kata, ngi la iatai bad la iarai ban pynjur ia ka jingiaid pahara miet ha manla ki shnong ki thaw. Ngi kyntu ia ki nong shongshnong jong ki shnong bapher bapher lyngba ki Dorbar Shnong ba kin iatreilang bad ka Tnad Pulit ha kaban talasi bad ban pynsngewthuh ia ki paidbah” ula pyntip.
