Nongpoh, Īaīong 25: Ka Federation of Khasi Jaintia & Garo People (FKJGP)-North Khasi Hills, hynne ka sngi Nyngkong, kala khang khyrdep ia 6 tylli ki karkhana kiba don ha ka Industrial Estate ka Meghalaya Industrial Development Corporation (MIDC), Umaiam namar ka jingshem ba kila treikam khlem ka Trading Licence bad ki buh Nongtrei khlem ka Labour Licence.
Ka FKJGP hapoh ka jingialam u General Secretary Bah Shanlang Diengdoh, kala hiar jurip ia kane ka Industrial Estate ban khynra Trading Licence bad Labour Licence hadien ka jingioh khubor kaba thikna lyngba ka RTI ba bun ki karkhana kila treikam beain ha kane ka jaka khlem da ioh ia ki kot ki sla (Trading Licence) ba donkam na ka Khasi Hills Autonomous District Council (KHADC).
Haba iakren bad ki nongthoh khubor, u Bah Shanlang ula pynpaw ia ka jingsngewkhia kaba jur ban lap ba bun tylli ki karkhana ha Umiam kila treikam beain bad wat ki nongtrei kiba dei ki bar Jylla kim shym la don satia ia ki Labour Licence ne wat ka Police Verification (jingthoh na ki Pulit ban pynshisha).
Pule lang ia kane: Pynpaw u Lat ka Mizoram ba ka India ka la iaid ha ka lynti jong ka GDKP, ym ka GDP
“Kane baroh ka wan jia namar ka jingkhein sting jong ki bor ka KHADC khamtam u Executive Member ka Tnad Trade bad Labour…kane kala wanrah ruh ia ka jingduhnong ha ka ioh ka kot ka Jylla” ula ong.
Ha kajuh ka por, ula kynthoh jur ia ka jingiohlad ki bar Jylla ban wan trei khlem kot khlem sla kaba ktah jur bad pynduhnong ia ki samla Khasi Khara kiba shong khlem kam khlem jam.
“Ngi la ioh jingtip ruh ba ki trai karkhana haba wan trei ki Khasi, ki ju nion bein bha da kaba pynkhia kam khnang ba kin iehkam bad ban iohlad ban thep ia ki bar jylla” ula kynnoh.
U Bah Shanlang ula ong ba ka Seng kan nym ailad shuh ia kum kine ki jingjia ba kin iai jia bad nangne shakhmat kan sa peitngor bha ia ka jingtreikam ki karkhana khamtam ia ka jingnion bein ia ki khasi khara.
Pule lang ia kane: Iakynduh u nonglamktien ka Japan ia u CM ka Nagaland u Rio, kyrmen ban kyntiew ia ka jingiadei
