Shillong, Lber 11 : Ka Sorkar Jylla kala hukum ban khang mardor ia ka mobile internet ha baroh hynriew tylli ki district ka ri-lum Garo ha ka sngi Balang hadien ba ki Pulit kila aikhubor ia ka jingshah wiang ding ki nongkynti, ka jingshah shoh bad ka jingpynphriang ia ki khubor lamler ha ki social media kiba don jingiadei bad ka jingkynad ba mih na ka elekshon GHADC.
Ha ka jingpynbna, u Principal Secretary ka Tnad Pohiing (Political) Bah FR Kharkongor ula ong “Namar kata, khnang ban khanglad ia ka jingpyndonkam bakla ia kine ki lad pathai ban pynthut ia ka jingshongsuk shongsain ha ka Jylla Meghalaya bad ban pynneh ia ka suk ka sain, Nga….pynmih ia kane ka jingpynbna hapoh ki kyndon jong ka kyndon 5(ii) jong ka Indian Telegraph Act, 1885 pule lang bad ka Temporary Suspension of Telecom Services (Public Emergency or Public Safety) Rules, 2017 ban khang ia kine ki lad pathai ha baroh ki District ka ri-lum Garo kata West Garo Hills, East Garo Hills, South Garo Hills, North Garo Hills, South West Garo Hills, bad South Garo Hills naduh mynta haduh da pynmih da kawei pat ka hukum.”
“Ka jingpynkhein ia kane ka jingpynbna kin shah pynshitom hapoh ka kyndon 223 BNS bad ruh ha kiwei ki kyndon ba iahap jong ka Indian Telegraph Act, 1885,” ula bynrap.
Kane ka rai kala mih hadien ka jingioh khubor na Police Headquarter bad ki Deputy Commission ka Garo Hills Division, ba bun ki jingjia kiba lah ban pynthut ia ka jingshongsuk shongsan, kila jia ha kylleng ki bynta jong ka ri-lum Garo ha ka 11 tarik Lber, haba iadei bad ka kam jong ka elekshon GHADC, bad bun ruh ki jingjia kila jiaha Tura bad kiwei ki jaka kiba lah ban buh jingma ia ka jingshngain ki apdibah ha ki district jong ka Garo Hills Division, kaba lah ruh ban wanrah ia ka jingbym don shuh ka suk ka sain.
Ki khubor ki iathuh ruh ba kila don ki jingjia wiang ding ia ki nongkynti, shoh ia ki nongshongshnong, ialum paidbah bad pynsaphriang khubor thok lyngba ki social media ban wanrah ia ka jingiakynad hapdeng ki jaidbynriew,ha baroh ki District ka ri-lum Garo.
Kila maham ruh ba ki rynsan kynthup ka Whatsapp, Facebook, X, YouTube bad Instagram ki lah ban long ki rynsan bala pyndonkam ban pynphriang ia ki jingtip.
