Shillong, Lber 11 : Ka A•chik Baptist Dal•gipa Krima No. IV, ka Garo Baptist Association ba don ha Tura, kala kyntu ia baroh ki nongshongshnong ban iashimbynta ha ka jingiaseng duwai ba kyrpang, kaba thmu ban wanrah pat ia ka jingsuk bad ka suk ka sain ha ka thain ri-lum Garo.
Ha kakyrwoh, ka Association kala kyrpad ia ki paidbah ba kin iawan bad pyndem lang ha ka jingduwai ha kum kane ka por, haba ban jur ia ka jinglong kongsan ka jingiatylli,ka jingsngewrit bad ka jingiasngewthuh jingmut hapdeng ki jaidbynriew bapher bapher.
Kat kum ka jingong kane ka Seng, ka jingthmu ba hakhmat eh jong kane ka jingiaseng duwai ka long ban ialam lynti ia ki briew sha ka lynti kaba dei, pynduh ia ka jingshun, bad wanrah ia ka jingialong kawei jong ki Jaidbynriew ha ka thain.
Ka Association kala kyntu ruh ia ki paidbah ban iaduwai lem na ka bynta kito ki briew kiba shah ktah ha ka jingkulmar bad ruh ia kito ki briew bad ki bor Sorkar kiba don ha ka kam ban pyrshang wanrah pat ia ka jingsuk ha ka thain.
Kane ka Association kala ban jur baka jingiaduwai lang bad ka jingialong kawei hapdeng ki nongshongshnong ka lah ban shim ia ka bynta kaba kongsan bha ha kaban pynkoit ia ka jingiapher jingmut bad pynkhlain ia ka mynsiem iasngew shipara ha baroh kawei ka thain ri-lum Garo.
Ki Nongialam ka Association ki pynpaw ia ka jingkyrmen ba lyngba ka jingduwai bad jingiatreilang, ka jingsuk bad ka jinglong ba jai jai kan sa wan biang shen ha ka thain.
Ha kajuh ka por, ka Mother’s Union, Tura, kala kyntu ia baroh ki riew paidbah ba kin kiar na ki kam be-ain kum ka jingpynjulor ia ki nongkynti bad kiwei ki kam riew bymman, haba pynpaw ba kum kine ki kam kin nym iarap satia ban ioh ia u soh uba kwah.
