Shillong, Jylliew 08 : Ka Sorkar Jylla kala hukum ban khang ia ka jingwan pynpoi ia ki dohkha nabar ka Jylla haduh 15 sngi namar ka jingshem ba ki dohkha kiba wan nabar ka Jylla ki dei kiba la injek ia ka dawai formalin ba kin ehdoh bad lait na ka jingpyut.
Kane ka hukum kala mih hynne ka sngi Palei na ka Commission of Food Safety ka Sorkar Jylla Kong RM Kurbah.
Kat kum ka hukum la ong, ba ka jingtip kala poi sha ka Ophis jong ka Commissioner of Food Safety ba na ki 40 tylli ki dohkha bala leh test, haduh 30 tylli ki dei kiba la test positive bala injek ia ka dawai formalin.
Ka ong ba kane ka long kat kum ka analysis report jong ka Assistant Food Analyst jong ka Sorkar Jylla kat kum ka Report No. SFTL/FW/2023-24/283-312 ba 6 tarik Jylliew, kaba long bih ba khlain bor bad ba ktah jur ia ka koit ka khiah.
Ka Commissioner kala ong ba ka jingkhaii, jingbuh bad jingdie ia ki dohkha bala injek da ka formalin lane kino kino ki dawai ba iada ia ka jingpyut, ka dei ka bym shngain satia ia ka koit ka khiah kat kum ka kyndon 3(1)(zz)(v) jong ka Food Safety and Standard Act, 2006.
Halor kane, ka ong ba haba pyntreikam ia ka kyndon (a) jong ka kyndon (2) kyndon 30 jong ka Food Safety and Standard Act, 2006, ka jingbuh, jingkhaii ne jingdie ia ki dohkha ba wanrah na shabar ka Jylla, la khang haduh 15 sngi naka bynta ka koit ka khiah ki paidbah tad haduh ban da shim ia ki sienjam kiba shngain ia ka koit ka khiah, ka ban treikam naduh ka sngi ba pynmih ia kane ka jingpynbna.
Ka Commission ka ong ba ka jingialeh pyrshah ia kane ka jingpynbna/hukum kan khring ia ka jingpynsajia da kaba shong phatok haduh 7 snem bad ka kuna ba T. 10 lak kat kum ka kyndon 59 (iv) jong ka Food Safety & Standard Act, 2006.
(zz)(v) jong ka Food Safety and Standard Act, 2006.){kind=link}