Shillong, Jylliew 04 : Ka District Magistrate, East Khasi Hills, kala pynbna ‘No-Drone Zone’ hapoh ka 3- kilometer radius jong ka State Convention Centre, Shillong naduh ka 3 tarik Jylliew haduh ka 5 tarik Jylliew.
Ia kane ka hukum la pynmih haduh ka kyndon 163 jong ka Bharatiya Nagarik Suraksha Sanhita, 2023.
Ia kane ka jingpyrrkhing la pynjari namar ka jingdon jong ka 73rd Plenary jong ka North Eastern Council, ka ban pynlong ha State Convention Centre naduh ka 3 tarik Jylliew.
“Bun ki VVIP bad ki heh ki hain kin sa wan iashimbynta ha kane ka jingialang” ong ka hukum haba bynrap “Ka hukum kan treikam noh mardor bad kan iai treikam naka bynta ka por naduh 3 tarik haduh 5 tarik Jylliew 2026”.
Ka hukum ka khnang ban pynher ia ki drone bad kine ki unmanned aerial vehicle ha kine ki jaka bala buh ha kine ki lai sngi.
Ka Sorkar kala pynkhlain bha ruh ia ka jingpahara ha ka thain na ka bynta kane ka jingialang ka ban pyniaid da u Myntri kam Pohiing ka Ri Amit Shah.
