Guwahati, Lber 18: Hadien ka jingkyrpad na ka seng kaba aijingiada ia ki mrad, ka People for the Ethical Treatment of Animals (PETA) India, na ka liang ka sorkar Mizoram ka la bthah ia baroh ki bor khmih district ba kin tehlakam ha kaba iadei bad ka jingpyndonkam bad ka jingdie ia ki jingriam kiba dambit ne ki ‘glue traps’ ia kiba ju pyndonkam ha ka ban tehlakam ia ki khnai.
Ha u snem ba la dep, ka PETA India ka la kyntu ia ka sorkar Mizoram ba kan khang pyrshah ha kaba iadei bad ka jingpynmih bad ka jingdie ia kine ki ‘glue traps’ ba shyrkhei kiba thmu ban tehlakam ia ki khnai.
Ha ka shithi ba la pyllait sha baroh ki Deputy Commissioner ha u bnai Nohprah ba ladep, na ka liang ka tnat AH&V department ka la kyntu ia ki bor khmih district ba kin shim ia ki sienjam ban tehlakam ha kaba iadei bad ka jingpyndonkam bad ka jingdie ia ki ‘glue traps’ hapoh ki jaka kiba ki khmih da kaba pynpaw ba ka jingpyndonkam ia kine ki glue na ka bynta ban riam ia ki khnai ka dei ka jingpynkhein ia ki kyndon jong ka ‘Prevention of Cruelty to Animals (PCA) Act, 1960, as well as the Wild Life (Protection) Act (WPA), 1972.’
Ha ka jingkyrpad kaba kham hahswa jong ka ia ka sorkar jylla, ka PETA India ka la wanrah ia ka mat halor ka jingpyndonkam pathar ia ki ‘glue traps’ kaba la buh jingma ym ang ia ki kynja khnai hynrei ruh ia kiwei pat ki jait mrad, kaba kynthup ia ki sim ki doh, ki risang, ki bsein bad ki jakoid kaba lam ruh sha ka jingiap kaba suki suki jong kine ki mrad kiba shah riam.
Ka PETA India ka la pynpaw ruh ba kaba biang eh ban tehlakam ia ka jingkharoi jong ki khnai ka long ban pynlong ia ka jaka kaban ym khring ia ki ne ba kin ym ioh ban wan rung, kumjuh ban pynduh ia ki tyllong kaba ki ioh bam da kaba pynkhuid bha ia ka madan madiah bad ban thep bha ia ki jingbam jingdih bad kiwei pat ki tiar da kaba pyndonkam ruh da ki kynja dawai smai ki ban pynher krad ia ki.
