Shillong Nohprah 27: Ka Employment Monitoring Cell jong ka Khasi Students’ Union bad ki nongialam ka KSU North Khasi Hills District Unit hynne ka sngi Palei, kila khang noh ia ka ophis treikam jong u Dean ka College of Post Graduate Studies in Agricultural Science, Umiam bad kala beh noh ia u Dean halor ka jingbym shimkhia ban pynlong ia ka jaka thoh eksam ha Umiam bad Shillong na ka bynta ki samla ka jylla kiba hap ban leit thoh ia ka eksam sha Guwahati.
Katkum ka kyrwoh na ka KSU kala pyntip ba kala leit sha katei ka jaka pule ban iakynduh ia u Dean hynrei haba kila ioh jingtip ba ula phet noh, kumta kila khang ia ka ophis ka jong u bad mar kumta hi u Dean ula wan poi noh sha College.
“Ka jingdawa ka Seng ka long halor ka jingpynlong eksam thungkam jong ka Lower Division Clerk bad Upper Division Clerk ba ka College ka buh ia exam centre sha Guwahati bad kane kan pynjynjar ia ki samla wad kam ban leit thoh ia ki exam shatei khamtam ia kito kiba wan na ka long iing kaba duna” la pynpaw ka KSU.
Kila pynpaw ba ka Seng ka suba jur ba la leh ia kane ban pynsuk ia kiwei ki bar jylla bad ki daw ki long ba ka advertisement la pynlait naduh u snem 2023 bad ka exam la dei ban thoh ha u Naitung 2024 ha ki jaka bapher bapher ha Umiam bad Shillong. Hynrei la pynkynriah noh ia kane bad la buh noh ban long sha Guwahati la 3 bad 4 tarik u Kyllalyngkot, 2025.
Ka KSU kala ong ruh ba kaba sngew phylla ka long ba ki briew na Garo ki thoh sha Tura, na Manipur ki thoh ha Imphal bad kiwei kiwei ki jylla ruh ki long kumta ha ka jaka jongki hynrei ia ki Khasi pat la phah thoh sha Guwahati.
“Kane ka pynbitar ia ka Seng bad kala hiar iakren myn ha ka 22 tarik u Nohprah, 2024 bad la buh ruh ka jingthoh hynrei na ka liang u Dean bad u VC ka CAU kim shim la leh eiei bad ki pyneh beit kaba la pynlong ia ka Seng ban hiar biang mynta ka sngi” ong ka KSU.
Ka KSU kala pyntip “Ka jingiakren kam shim la long kaba ryntih namar u Dean um shim kwah ban kubur ia ka jingbakla bad ban pynbeit ba ka exam kan long beit ha Umiam/ Shillong kaba la pynlong ia ka Seng ban beh noh ia u na College bad lada um pynbeit ia kane ka kam, na ka liang ka Seng ruh ka nym shah shuh ia u ban long kum u Dean kane ka College bad ban iuh kjat ha ka jylla” la pynkut ka kyrwoh na ka KSU.
