Shillong, Kyllalyngkot 27: Ka seng Hynniewtrep National Youth Movement kala pynbna ba kan ym shah ia ki nongialam ne ia ki dkhot jong ka seng ba kin leit ialap elekshon ne ban rung dkhot ha kano kano ka seng saiñ pyrthei.
“Ki nongialam ne ki dkhot ka HNYM ki don ia ka hok ban iashimbynta haka jingthep vote ban jied ia ki nongmihkhmat hynrei katkum ka riti treikam jong ka seng, la mana bad khang pyrshah ba kim dei ban don ha kano kano ka seng saiñ pyrthei ne ba kin leit ialap elekshon na ka bynta uno uno u kyrtong ne ia kano kano kano ka seng saiñ pyrthei” ong u President ka HNYM u Bah Louis Dohtdong.
Ula ong, ka jingbym shah ka seng ban iadonbynta ha ki kam elekshon kadei namar ba ki politishan ki lah ban thok ia ki paidbah da ki spah sien hynrei u nongialam sengbhalang yn ym lah ban thok ia ki paidbah.
“U Politishan u lah ban thok 100 sien ia ki paidbah bad ki paidbah kin ngop beit namar ba u pynbeij da ka pisa hynrei ngi ki nongialam sengbhalang ngim lah ban thok ia ki paidbah namar dei ki paidbah kiba mih ban ai jingkyrshan ia ki mat jingdawa jong ngi ki Sengbhalang namar ka jingieid bad jingshaniah” ong u Bah Louis.
U President ka HNYM ula ong ki dkhot ka seng ki don ia ka hok ban thep vote bad ban jied ia ki nongmihkhmat bad ka seng kan ym bthah eiei ia ki ba kin kyrshan ia uno uno u kyrtong, hynrei ka seng ka ieh beit ha ka jingstad ka jong ki dkhot ban jied ia u nongmihkhmat ha ka constituency ka jongki.
