Shillong, Rymphang 02 : Ki bor District ka East Khasi Hills kila pynjari ia ka kyndon 163 BNSS, ba khang ban khaii, buh bad die ia ki dokha ba wan shalan be-ain na Ri Bangladesh.
La khang pyrshah ban shalan ia ki dohkha Bangla khlem ki kot ki sla kiba biang, ban pyndonkam ia kino kino ki kam, ki lieng, ban iarap, ai jaka sah lane iarap ia ki briew kiba donkti ha kum kine ki kam beain hapoh u pud u sam ka District.
Ia kane ka hukum la pynmih halor ki khubor ba iohlum ba ka don ka jingkhaii beain ia ki dohkha ba wanrah na Bangladesh lyngba ki lynti khappud bapher bapher, ki wah, ki surok bad ki jaka iew hapoh ka Jylla.
Ka ong ba kane ka khaii beain bad pynrung tuh ia ki dohkha Bangla ka dei ka jingpynkhein ia ki kyndon ka Custom bad kiwei ki kyndon ka Food Safety bad kiwei kiwei.
Ka hukum ka ong ruh ba kum kane ka jingdie bad jingsam be-aiñ, khlem da peit bniah bad khlem pynshisha ïa kine ki dohkha ba wan nabar ri ka buh jingma kaba khraw ïa ka koit ka khiah ki paidbah bad ka jingkhuid jingsuba, ka ktah jur ïa ka kam ri dohkha ha Jylla bad wanrah ïa ka jingduhnong ha ka liang ka ioh ka kot ïa ki nongkhaii dohkha ba deihok bad ka sorkar jylla.
Kano kano ka jingpynkhein ia kane ka hukum kin ngat ha ka jingpynsajia kat kum ka kyndon 223 jong ka BNS bad kiwei ki kyndon ain kynthup ka Custom Act, Foreigners Act, Passport Act bad kiwei kiwei.
Kane ka hukum kan treikam noh mardor tad haduh da pynmih da kawei pat ka hukum.
