Nongstoin, Lber 05: Ka District Magistrate ka Eastern West Khasi Hills District Mairang, kala khang ia ka jingiaid ki kali heh kiba kit mar ba khia palat 9 ton na u surok Mawmaram-Nongthliew-Mawmih-Mawlyndep kaba hap hapoh u pud u sam ka Eastern West Khasi Hills District.
Ka Magistrate kala hukum ia kane da kaba pynjari ia ka kyndon Ain 163 BNSS 2023.
Ia kane ka hukum la pynmih hadien ka jingioh jingtip ba ki don bun ki kali heh kiba kit palat iaka 9 ton ka jingkhia, kiba iaid man ka sngi na ka surok Mawmaram-Nongthliew-Mawmih-Mawlyndep kaba la buh jingeh ia ka iaid ka ieng jong ki nongshong shnong, khamtam ki khynnah skul bad ruh kaba la wanrah ia ka jingjot jong katei ka surok.
Lada lap ia kino kino kiba ialeh pyrshah bad pynkhein ia kane ka kyndon ain, kin ngat ha ka jingshah pynshitom kat kum ka Section 223 jong ka BNSS, 2023.
Kane ka ain kan treikam naduh mynta tad haduh ban da pynbna da kumwei pat. Ha kajuh ka por lada don ki bym sngew iahap ia kane ka kyndon, ki lah ban leit mih sha ka ophis ka Deputy Commissioner Eastern West Khasi Hills District na ka bynta kiwei pat ki jingpynkylla lada I donkam.
