Shillong, Rymphang 18 : Katba ka sngi thep vote kala nang jan bad ka por ialap elekshon kala jan kut, ka lyer jong ka elekshon Autonomous District Council (ADC) sha ka Iingdorbar ka Khasi Hills Autononomous District Council (KHADC) ka la beh sha ki saw tylli ki seng sain pyrthei-kiba don hapdeng ka jingiatan tyllai ban ioh khur bun eh ka jingjop.
Kine ki saw tylli ki seng sain pyrthei ki dei ka National People’s Party (NPP) kaba bat ia u lakam ka synshar khadar ha Jylla, ka paralok ba iatreilang ha ka Sorkar Jylla-ka United Democratic Party (NPP), ka Liang Pyrshah-Indian National Congress (INC) bad ka Voice of the People Party (VPP).
Ha ka jingiaid peit pyrman ka Shlem na ki rynsan ialap elekshon ha kylleng ki 29 tylli ki Constituency ka KHADC, la shem ba ka jingiakhun kan long kaba itynnad bha ha jan baroh ki constituency khamtam ha ki 10 tylli ki constituency ki bym don MDC shuh (don ki MDC kiba sangeh iakhun elekshon, don kiba sangeh ba la long MLA bad ki MDC ba khlad noh).
Kine ki 10 ngut ki MDC ki kynthup :
Ronnie V. Lyngdoh (Congress MDC & MLA ka Mylliem)
Paul Lyngdoh (UDP MDC, Jaiaw bad MLA ka West Shillong)
Charles Marngar (NPP MDC & MLA ka Mawhati)
Gabriel Wahlang (NPP MDC & ‘MLA ka Nongstoin)
Martle Mukhim (MDC, Mawkynrew)
Gigur Myrthong (MDC, Mawshynrut)
Bajop Pyngrope (MDC, Rambrai-Jyrngam)
Sherborlang Mawlong (MDC, Sohiong)
(L) Bah Teinwell Dkhar (MDC, Shella)
(L) Bah Latiplang Kharkongor (MDC, Nongthymmai).
East Khasi Hills District
Ka East Khasi Hills ka don haduh 17 tylli ki constituency bad 11 ngut ki sitting MDC kin iakhun ban jop biang sa shisien ia kane ka elekshon ba kynthup ia lai ngut ki Chief Executive Member (CEM) barim Bah Pyniaid Sing Syiem uban iakhun na ka NPP Nongthymmai bad Bah Titosstarwell Chyne na ka UDP na Sohra bad bah Pynshngain N Syiem na ka Congress na Mawkhar-Pynthorumkhrah constituency.
Haduh 5 ngut na kine ki sitting MDC ki dei jong ka NPP katba 3 ngut na ka UDP, u Bah PN Syien na ka Congress bad arngut ki MDC ba iakhun kum ki kyrtong shimet-Bah Teibor Pathaw na Mawlai bad Bah Lambor Malngiang na Nongkrem.
Baroh kine ki sitting MDC ki don hakhmat eh jong ka jingiakhun hynrei ka jingiashongshit u paidbah ha ka VPP (Prah) ka lah ban pynkylla ia ka result jong ka elekshon tang ha ki katto katne ki constituency khamtam ha ki constituency ki bym don MDC shuh.
Ki 4 tylli ki constituency ba mihkhmat da ka VPP ha ka kam MLA-ka Mawlai, Mawryngkeng, Nongkrem bad North Shillong ki dei ki constituency kiba ki paidbah ki phaikhmat bha khamtam na ka jingpur ki khubor jingkynnoh ba ieh khunswet ki MLA ia ki paidbah. U dak jingkylli u mih ba hato ka VPP kan dang lah ban pynioh ia ka jingjop na kine ki constituency?.
Khamtam ka Nongkrem constituency ba mihkhmat hi da u President ka VPP Bah Ardent M Basaiawmoit bad kumjuh ruh ka Mawlai-kaba ki sitting MDC kiba iakhun mynta kum ki kyrtong shimet ne Independent, ki dei kiba khlain bha bad kiba la ioh ia ka jingiaroh ia ka jingtrei kam jong ki ha kaban shakri ia ki paidbah ka constituency, khlem da iakren ia ka Mawkhar-Pynthorumkhrah bad Jaiaw constituency kiba hap hapoh ka North Shillong LA constituency, kaba don hapdeng ka kynrum kynram na ka jingiashrut bad iapher jingmut hapdeng ki nongialam ka VPP bad u sitting MLA lajong.
Ha Ri-Bhoi District :
Na ki jingpeit pyrman, ka Ri-Bhoi kaba don 5 tylli ki Constituency – Ka Umroi, Umsning, Nongpoh, Mawhati bad Jirang, kan sakhi ia ka jingiakhun kaba lamkhmat da ka NPP – da ka jingdon haduh 4 ngut ki MLA ba mynta bad ki sitting MDC. Ha baroh 5 tylli ki constituency, ka seng kaba paw hakhmat eh ka dei ka NPP hynrei kam long pat ban khein troin ia ka seng Congress, UDP kynthup ruh ia u kyrtong shimet ka Umroi bad MLA barim Bah George B Lyngdoh, kiba lah ban pynkyndit ia ka result.
Ka VPP ha them Ri-bhoi kam pat da suhthied bha watla ki paidbah ki ia shongshit shane shatai. Kumba long ha ka elekshon MLA bad MP-Lok Sabha, ka VPP kan ap satang ia ka jingkylla ka mon u paidbah ynda la dei ka sngi thep vote-ha ka 21 tarik u Rymphang. Ka VPP ka lah ban bam da u brut ha kane ka District.
Eastern West Khasi Hills District:
Kane ka District ka don artylli ki constituency-ka Pariong-Mawthadraishan bad ka Mairang constituency kiba mihkhmat mynta da u MDC ka NPP Bah Batskhem Ryntathiang (Mairang) bad MDC ka UDP Bah Jambor War (Pariong-Mawthadraishan).
Ha Mairang ka jingiakhun kaba pawkan long kaba lai mamla-ka NPP, UDP bad ka VPP hynrei na ka jingsaphriang ki video lyngkot jong u President ka VPP Bah Ardent M Basaiawmoit ba kynthoh ibein ia ki nongshongshnong ka Nongkhlaw, kane ka lah ban ktah ia u kyrtong jong kane ka seng sain pyrthei ba dang thymmai ha kane ka constituency.
Ha Pariong-Mawthadraishan-ka jingiakhun hangne ruh kan long kaba lai mamla-ka UDP kaba pynieng ia u sitting MDC, HSPDP kaba pynieng ia ka hynmen u MLA bad Myntri Sorkar Bah Shakliar Warjri bad ka VPP kaba pynieng ia u nongthoh khubor Bah Powell Sohkhlet. Ka rai u paidbah ka shong eh ba haduh katno ki kam jong u MLA bad Myntri Sorkar ki lah ban tehsong ia ka jingieid u paidbah.
West Khasi Hills District
Kane ka District ka don 3 tylli ki constituency-ka Nongstoin, Rambrai-Jyrngam bad ka Mawshynrut ha kaba baroh lai tylli ki constituency ki dei kiba long kylluid (open) ia baroh ki kyrtong namar ka jingbym don shuh ki sitting MDC ban iakhun.
Kat kum ka jingiathuh ki nongpeit pyrman ka Shlem, ha Nongstoin ka jingiakhun kan long hapdeng ka NPP bad ka Congress khlem da buh shadien ia ka VPP kaba la thohbria khyndiat na ka kam ai ticket elekshon-kaba la pynbitar ia kiba bun ki nongialam bad nongkyrshan jong kane ka party.
Kumjuh ruh ha Rambrai-Jyrngam ka jingiakhun kan long hapdeng ka NPP-HSPDP bad u kyrtong shimet ba pynieng u MLA katba ha Mawshynrut ruh kan long hapdeng ka NPP bad ka HSPDP.
South West Khasi Hills District
Ha kane ka District kaba don artylli ki constituency-ka Mawkyrwat bad Langrin constituency, ka lah ban sakhi ia ka jingia khun hapdeng ka NPP-UDP bad ka Congress. Ka UDP ka dei kaba bat ia ka shuki MLA ha baroh artylli ki constituency bad u MLA ka Ranikor uba dei ruh u sitting MDC ka Langrin u ieng iakhun hi ha kane ka elekshon.
Haduh 9,96,518 ngut ki paid nongthep vote kin iathep ia ka vote jong ki ha ka 21 tarik u Rymphang ban jied ia ki 29 ngut ki MDC napdeng ki 158 ngut ki kyrtong ba kynthup ia 12 ngut ki kynthei ha kane ka elekshon.
Ki sitting MLA kiba mih ban aireng ha kane ka elekshon KHADC ki kynthup ia u Bah Sosthenes Sohtun (NPP MLA, Jirang), Bah Pius Marwein (UDP MLA, Ranikor & sitting MDC), Bah Matthew Beyondstar Kurbah (UDP MLA, Mawphlang) bad Bah Synshar Kupar Roy Lyngdoh Thabah (UDP MLA, Sohiong).
Don ruh ki MLA barim kiba mih ban aireng ha kane ka elekshon KHADC bad kine ki dei u Bah George B. Lyngdoh (MLA barim ka Umroi – IND), Bah Samlin Malngiang (MLA barim ka Sohiong – NPP), Kimfa Sidney Marbaniang (MLA barim ka Rymbai-Jyrngam – NPP), Lambor Malngiang ( MLA barim ka Nongkrem – IND), Bah Process T. Sawkmie (MLA barim, Mawlai – IND) bad Bah Pyniaid Sing Syiem (MLA barim ka Mawryngkneng bad sitting CEM ka KHADC ban iakhun na Nongthymmai).
Ka jingniew ia ki vote kan long ha ka 24 tarik u Rymphang.
 sha ka Iingdorbar ka Khasi Hills Autononomous District Council (KHADC) ka la beh sha ki saw tylli ki seng sain pyrthei-kiba don hapdeng ka jingiatan tyllai ban ioh khur bun eh ka jingjop.){kind=link}