Guwahati, Rymphang 22 :Lada phi tharai ba ka jingjakhlia ka lyer ha Delhi bad Noidi bad ba phi shong phi sah ha ka sorbah Guwahati bad ioh ban ring mynsiem da ka lyer kaba khuid, lehse phi dei ban pyrkhat arsien.
Katkum ka Air Quality Index, ka Guwahati ka wan ha ka kyrdan kaba 13 ha ka list jong ki 50 tylli ki sorbah kiba don ia ka lyer kaba jakhlia tam ha ka pyrthei, katba ka Delhi ka wan ha ka kyrdan kaba 37.
Ha kawei pat ka liang, ka Guwahati, Agartala bad Gangtok ki la don ha ka list napdeng ki 50 tylli ki sorbah kiba don ia ka lyer kaba jakhlia tam ha ka pyrthei.
Namar ka jingjakhlia jong ka lyer ha ka sorbah Guwahati, kane ka la wanrah ruh ka jingsngewkhia kaba jur ha kaba iadei bad ka koit ka khiah khamtam na ka bynta ki khunlung khynnah.
Haba kren sha ka lad pathai khubor, na ka liang u Superintendent ka GMCH, u Dr Abhijit Sarma ula ong; “Ki la don haduh 36 ngut ki khynnah kiba shah sumar hapoh GMCH namar ka jingshitom kaba iadei bad ka jingring bad pynhiar mynsiem, kata namar ka jingjakhlia jong ka lyer, hynrei watla katta baroh ki la kham ioh koit.” “Kine ki khynnah ki la wan shah sumar namar ka jingshitom Bronchiolitis, Asthma bad Pneumonia,” u la ong shuh shuh.
Tang ha ki 24 kynta ki ba la dep, haduh 36 ngut ki khynnah ki la shah sumar hapoh Gauhati Medical College and Hospital, ha kaba kila ujor ha kaba iadei bad ka jingshitom ha kaba ring bad pynhiar mynsiem.
