Shillong, Iaiong 28 : Ki Pulit ka South West Garo Hills, kila kem sa 2 ngut ki briew, kaba kyntiew mynta sha ka 9 ngut kiba la poi ha along, kiba donkti ban rahbor bad leh beijot ia arngut ki khynnah kynthei ha ka shnong Chenga Benga Mela myn ha ka 16 tarik Iaiong.
Kat kum ka jingpyntip u Superintendent of Police ka District, u Vikash Kumar, baroh kine ki 9 ngut ki runar ki dei na ka shnong Teporpara, Assam, kaba don mar syndah bad ka jaka ba leh beijot ia kine ki khynnah.
U pyntip ba ia kine ki briew la ioh ban kem da ka jingiarap jong ki Pulit ka Salmara District. Ki Pulit kila ioh ban kurup haduh 7 tylli ki mobile phone na kine ki briew bad mynta ka jingtohkit ia kine ki mobile phone kala iaid shakhmat.
Ia kine ki runar la register case hapoh Ampati Police Station hapoh ki kyndon 376D/323/341/506/34 jong ka IPC bad ka kyndon 5(g)/6 jong ka POCSO Act.
Ha ka jingtohkit, ki Pulit kila lap ba kine ki runar kila knieh jubor ia kawei ka mobile phone jong uwei pat u briew bad kila byrngem byrsit bad dawa pisa ruh na uwei pat u briew.
Halor kane ka kam bymman, ki Pulit kila register case biang sa artylli ia kine ki runar ha Ampati Police Station.
U pyntip ba ka jingtohkit mynta kala iaid shaid shaid bad yn sa kem ruh ia kiwei pat ki runar kiba iadon bynta ha kane ka kam bymman.
