Kurup bun bah ki muhor ki Tnad Sorkar
Shillong, Nohprah 08: Ki Pulit ka Ri-Bhoi District kala ioh ban kem ia uwei u snar uba dei jong kynhun ki nongkhaii tiar siat bad ki met mrad khlaw ha ka jingkhynra bala pynlong hapoh ka District.
Kane ka kynhun ka dei ruh kaba donkti ha kaban shna ia ki kot thok bapher bapher jong ki Tnad Sorkar ka Jylla.
Ia kane la pyntip da u Myntri Rangbah ka Jylla Conrad K Sangma haba pynphriang ia kane ka khubor lyngba ka X (tweeter bad mynshuwa).
Ia une u briew la ioh kem da ka kynhun ki Pulit ka Pillangkata Outpost bad ka Umiam Police Station ha ka jingkhynra ba pynlong hynnin ka miet.
Une u briew ba shah kem u dei uba na Mizoram bad u dei uba sah ha 9th Mile, Baridua, Ri-Bhoi District.
Ki Pulit ki pyntip ba kane ka jingkhynra da ki Pulit ka Ri-Bhoi ka dei kaba la pynlong halor ka jingioh khubor bad ki jingtip kiba bniah n aka Military Int Unit ka Eastern Command.
Na une u briew, ki Pulit ka Ri-Bhoi kila ioh ban kurup haduh 1052 tylli ki kuli AK-47, 7 tylli ki kuli LMG 7.62, 14 tylli ki kuli 5.56 jong ka INSAS, 30 tylli ki kuli .32 jong ka pistol, 2 tylli ki grenande, 4 tylli ki magazine, 34 tylli ki muhor jong ki Tnad bapher bapher bad 9 tylli ki reng bad ka shynrong khlieh jong ki skei bad ka song pisa.
Haba thoh ha X, u Myntri Rangbah ula ong “Ki Pulit ka Ri-Bhoi, lyngba ka jingtrei shitom ba khlem thait, kila lah ban pynjem khnap ia ka bor ka jingdum kaba pynlong sohpdung ia ka Jylla. Kawei ka kynhun runar ba iakhleh Jylla (interstate) kiba leh ia bun ki kam bymman kaba long naduh ka jingkhaii tuh ia ki tiar siat bad ki mrad khlaw bad ruh ka jingshna thok ia kikot ki sla jong ki Tnad Sorkar, kila shah kem”.
U Myntri Rangbah ula pyntip “Ka jingioh kurup ka kynthup ia 1052 tylli ki kuli AK-47, 2 tylli ki grenande, 4 tylli ki magazine, 34 tylli ki muhor jong ki Tnad bapher bapher bad 9 tylli ki reng bad ka shynrong khlieh jong ki skei bad ka song pisa. Kudos ia ka kynhun baroh kawei jong ka Meghalaya Police bad LR Bishnoi, IPS”.
The @RibhoiPolice through its unwavering resolve and tireless efforts have dealt a decisive blow to the forces of darkness targeting our state. One notorious interstate criminal who is entangled in a web of illegal activities that spanned from trafficking of arms and precious… pic.twitter.com/d7HdUM2eEZ
— Conrad K Sangma (@SangmaConrad) December 8, 2023
La pyntip ruh ba ka jingtohkit kala iaid shakhmat ban wad naduh tynrai ia ki kam bymman bad ki runar baroh.
