Shillong, Jymmang 12 : Ki Pulit ka East Jaintia Hills kila ioh kem ia uwei u samla na Lower Mawprem, Shillong, katba u dang wanrah ia u droks na Assam ban pyniaid iew ha Nongbah Shillong.
Une u samla u kyrteng u Gabriel Elvin Thabah ba 33 snem, uba shong ha Bishop Falls marjan ka skul Sein Raij, Lower Mawprem. Na une u briew, ki Pulit kila ioh ban kurup haduh 67.36 gram u heroin, ong u Addl SP Bah B Jyrwa.
U pyntip ba ki Pulit kila pynap shrip ha Lumshnong hadien ka jingioh jingtip ba un don u nongkhaii droks uba dang wan na Silchar, Assam sha Shillong.
U iathuh ba ha ka por 1.20 janmiet ba ki Pulit kila bat ia kawei ka Tata Sumo kamai bad kila ioh bat ia une u samla. U iathuh ba ha ka jingdon lang ki nongsakhi shimet, ki Pulit kila talasi ia une u briew bad kila ioh ban kurup haduh 6 tylli ki synduk sabon ba don ia u powder rong stem.
Une u Heh Pulit u pyntip ba ia une u powder la leh test bad la shem ba u dei u heroin.
Ki Pulit kila register case pyrshah ia une u briew ha Lumshnong Police Station hapoh ka kyndon NDPS Act bad ka jingtohkit mynta ka dang iaid shakhmat ban lap ia ka briew kila pynpoi ia u droks bad shano ba une u droks un leit.
Ha kawei pat ka jingjia, ki Pulit kila ioh ban kurup haduh 111.18 kilo u ganja na ka kali AS01-AY06969 kaba dang wan na Silchar, Assam ban leit sha ki thain Khliehriat.
Haba iohi ia ki Pulit ba talasi kali ha Damcherra, Umkiang, NH-06, u nongniah ula phet krad na kane ka kali ha ryngkat bad uwei u nongbud. Ha ka jingtalasi, ki Pulit kila lap ia u ganga bala buhrieh hapoh ka kali.
