Shillong, Jymmang 05: Ki pulit jong ka East Jaintia Hills ha ka miet sngi Palei, kila iohkem ia arngut ki nongdie drug na Assam bad ioh kurup ia u drug Heroin uba khia 65.32 gram.
Ki pulit haba ioh ia ki jingtip kiba paka ia ka jingdon ki ar ngut ki nongdie drug ha kawei ka Tata Truck kaba don ia u nombar AS-028-AC-0492 ba wan sha Khliehriat, kila pynlong ia ka jingpynap shrip ha Byndihati Petrol Pump bad ha ka por 9.45 baje mynmiet, kila ioh bat ia kane ka trok lem bad ia kine ki nongkhaii droks.
Ki Pulit ki iathuh ba kane ka trok ka dei kaba kit dewbilat. Ha ka jingtalasi ia kine ki arngut, ki Pulit kila ioh kurup ia u droks heroin ba khia 65.32 gram bala thep ha ki 6 tylli ki synduk buh sabon, kawei ka tyndong thep khaini, kawei ka mobile phone bad ka pisa 500 tyngka bad la song ia kine hakhmat jong ka jingdonlang ki nongsakhi.
Kine ki arngut ki nongkhaii droks ki dei kiba kyrteng u Jaydar Ali bad u Sanidul Islam kiba dei na Barpeta Assam.
Ki Pulit kila register case ia kine ki briew ha ki kyndon jongka NDPS Act bad ka jingtohkit mynta ka dang iaid shakhmat.
