Agartala, Naitung 18: Ki Pulit ka Assam ha ryngkat ka jingiatreilang bad ki Pulit ka Belonia Police Station, kila kem ia uwei u samla na South Tripura District halor ka jingdonkti ban khaii ia ki briew na Bangladesh.
“Ka kynhun ki Pulit ka Assam ba ialam da u Sub Inspector Chitta Ranjan Bhora kila poi ha Belonia Police Station ha ryngkat ki kot ki sla ban kem ia u Partha Sen” ong u Paritosh Das, Officer Incharhe ka Belonia Police Station haba bynrap “Une u briew u dei uba shah thwet halor ka case bala register ha Silchar Police Station ha u snem 2022, kaba long halor ka kyndon bapher bapher jong ka Passport and Foreigners Act bad ruh halor ka jingkhaii ia ki Rohingya hapoh ka kyndon 370 jong ka IPC”.
Da ka jingiarap ki Pulit ka Belani, ki Pulit ka Assam kila kem ia u Partha Sen bad la ialam tian bishar ia u sah Iingkashari ba kan ai jingbit ha kaban ialam noh ia u sha Assam. Ia une u briew la ialam mynta sha Silchar.
U Das u pyntip ba une u juh u briew u dei uba la shah kem teng ha Belonia myn ha ka 12 tarik Naitung ha ryngkat bad kawei ka kynthei Bangladesh. Ki Pulit kila register case pyrshah ia u ha Belonia Police Station hapoh ka kyndon 461,471, 120_b bad 370 jong ka IPC bad ruh jong ka Passport Act.
U Partha Sen uba la ioh jamin dang shen ha ka case ha Belonia Police Station, ula shah kem biang mynta ha ki Pulit ka Assam bad la ialam noh ia u sha Silchar halor ka hukum ka Iingkashari.
