Nongstoin, Naitung 18: Ka KSU Ri Muliang Circle kala dawa ia ka Meghalaya Rural Bank (MRB) ba kan buh noh ia ka shnat treikam jong ka Bank ha Nonglang kaba hap hapoh ka Ri Muliang Block, West Khasi Hills.
Ia kane ka jingdawa la buh hakhmat ka Chairman ka MRB ha ka jingleit iakynduh ki nongialam ka Seng ba kynthup ia u President samla Biangboy Sangriang, samla Dominic Kharmaw bad bala synran da u Asst GS ka KSU-West Khasi Hills samla Armstrong Sohshang.
Ki Nongialam ka KSU ki pyntip ba ka Chairman ka MRB kala bthah ban leit iakynduh ia u Regional Manager ka MRB ba dei peit ia ka West Khasi Hills bad hynne ka sngi Ba-ar, ka seng kala iakynduh ia une u Heh ka Bank ha Nongstoin.
Ha kane ka jingiakynduh, utei u Heh ka MRB ula pynpaw ba ka thain Ri Muliang, ka la dei hok ban don noh iaka bank bad u la kular ban sa leit jurip ia katei ka thain shwa ban buh ia katei ka bank ha kine ki taiew ban wan.
Kumban shu pynkynmaw ba ka thain Ri Muliang ka dei ka thain kaba dang sahdien ha baroh ki liang bad ka bank ka ba jan tam ka dei hapoh Seinduli kaba jngai kumba 35 haduh 45 kilo meter bad ki paitbah ki shem jingeh shibun eh naka bynta ban leit donkam ha ka bank.
Namar ka jingsahdien ha ka thain baroh kawei ka Sorkar MDA 1 ha u snem ba la dep kata ha ka 22 tarik Naiwieng 2022, ka la plie iaka C&RD Block ha ka shnong Nonglang West Khasi Hills na ka bynta ban wanrah iaka roi ka par hapoh ka thain.
