Shillong, Nailur 27 : Ki Pulit ka East Khasi Hills, kila ioh kem ia uwei u runar uba la shukor pisa da ki lak tyngka na ka Investment Scheme haba kam ialade kum u Assistant Area Manager ka KFC.
Une u runar u kyrteng u Ibrahim Ansari ba la 59 snem bad la kem ia u na ka shnong Senha Muslim Mohalla kaba don ha Lohardaga District jong ka Jylla Jharkhand.
Kat kum ka jingiathuh u Superintendent of Police ka East Khasi Hills Bah S Nongtnger, Ki Pulit ka Rynjah Police Station kila iohpdiang ia ka ejahar ha ka 21 tarik Nailar 2024 ba don uwei u briew ba ai kyrteng Abhishek Kumar Yadav, uba kam thok ialade kum u Area Manager ka KFC, ula tyrwa ia ka Investment Plan/Scheme kaba kot haduh T.19,27,000.
U iathuh ba une u Nongmudui ula ngeit ia kane ka scheme ba ka dei kaba shisha bad ula siew ia ka installment ba nyngkong ha ka 14 tarik Jylliew bad kiwei ki jingsiew ha ki taiew ba bud bad ka installment ba khatduh ha ka 6 tarik Nailar 2024.
U pyntip ba dei hadien ka jingpynslem, ba une u nongmudui ula shem ba u Abhishek um don jingiadei satia bad ka KFC bad ba ula shah shukor.
Ki Pulit kila register case halor kane ka jingjia bad ha ka jingtohkit, kila iohkem ia u Ibrahim Ansari. Ka jingtohkit mynta ka dang iaid shakhmat ban lapdien ia kiwei pat ki briew kiba donkti lang.
