Ngin kem ia baroh kiba donkti kat kum ka Ain, ong u SP
Shillong, Iaiong 28 : Ki Pulit ka East Khasi Hills, hynne ka step sngi Nyngkong, kila kem ia u President ka North Eastern Hill University Students’ Union (NEHUSU) Sandy Sohtun halor ka jingshoh bad byrngem pyniap ia u Professor dang shen ha NEHU.
Haba pynthikna ia kane, u Superintendent of Police Bah Vivek Syiem, ula pyntip ba ia une u President ka NEHUSU la kem hynne ka sngi na NEHU.
Ka dei ha ka janmiet 24 tarik Iaiong, 6 ngut ki samla pule ka NEHU ba ialam da u President ka NEHUSU, la kynnoh ba kila leit rung jubor bad khangkut ia u Professor ka Tnad Hindi Dr Alok Singh hapoh ka kamra treikam jong u, hashuwa ba kin shoh dusmon da kaba kynjat bad kura ia u, kaba la neh haduh 30 minit eiei.
Kine ki samla pule kila pynap ruh da ka khanshi khap kot na ryngdang jong une u Professor ryngkat ka byrngem byrsit ba kin pyniap. Kane ka jingleh riewkhlaw kine ki samla pule kala jia da ka jingkynnoh ba une u Professor u leh politics bad thmu wanrah ia ki jingsngew iapher hapoh ka skulbah.
U Dr Alok Singh ula mudui da ka ejahar pyrshah ia u Sandy Sohtun bad san ngut kiwei pat ha Mawkyrwoh Police Outpost.
Haba kylli, u Bah Vivek ula iathuh ba ki Pulit kin sa kem ia baroh ki samla kiba donkti ban leh ia kane ka kam bymman.
Une u Heh Pulit ula pynpaw ba ka jingtohkit mynta kala iaid shakhmat bad ka Ain kan sa iaid la ka jong ka lynti pyrshah ia ki ba donkti baroh.
 Sandy Sohtun halor ka jingshoh bad byrngem pyniap ia u Professor dang shen ha NEHU.){kind=link}