Shillong, Naitung 11 : Ki Pulit ka East Khasi Hills kila kem ia u Nongialam ka Khasi Students’ Union (KSU) halor ka jingkynnoh ba u donkti ha ka jingshah shoh ki nongbylla bar jylla ha ka por ba khynra Work Permit.
Une u Nongialam ka KSU u dei u President ka Nongthymmai Circle samla Eric Nongkhaw.
Kat kum ka jingiathuh u Vice President ka KSU Nongthymmai Richard Mawkhiew, ki Pulit kila leit kem ia u samla Eric ha ka por shiteng miet. Ula kynnoh ba kane ka rukom kem ka iasyriem kumba kem ia ki kynhun kaikhlaw.
U samla Richard ula ong ruh ba kane ka jingkem kan ym pynsangeh satia ia ka seng ban leit khynra work permit ia ki nongbylla bar jylla kiba wan trei bylla khlem ki kot ki sla kiba biang.
Une u Nongialam ka KSU ula buh jingkylli ia ka Tnad Pulit halor ka rai ban wan kem ha ka por mynmiet ia u Nongialam ha ka jaka ban kem ha ka por mynsngi mynshai.
Ka KSU kala pynlong ia ka jingkhynra Work Permit ia ki nongbylla bar jylla ha kylleng ki jaka jong ka Nongbah Shillong ha kine ki khyndiat sngi bala leit noh. Kane ka jingkhynra kala treikam ruh ha kylleng ki District ka Ri-lum Khasi.
Ha ka 8 tarik Naitung, la kynnoh ba ki dkhot ka KSU kila shoh ia katto katne ki nongbylla bar jylla kiba pyntrei ia ka JN Sports Stadium ban pynkhreh ia ka lympung ialehkai Durand Cup.
U Myntri Rangbah ka Jylla ConradK Sangma ula pynshai ba ki nongbylla bar jylla ba wan na shabar ka Jylla, kim donkam satia ban leh work permit hynrei ki donkam tang ban pynrung kyrteng ialade hapoh ka tnad Labour.
Ula pyntip ruh ba ki Pulit kila register haduh saw tylli ki case halor ka jingshah shoh ki nongbylla ha JN Sports Stadium.
