Tura, Iaiong 28 : Uwei u Nongtrei ka Garo Hills Autonomous District Council (GHADC) ba dei ban peit ia ki jaka puta bala tip kum u Mondol, ula shah kem ha ki Pulit ka Tura hadien ba ka jingtohkit kaba leh thikna bha, kala shem ba ma u lem bad kiwei ki briew, kila die tuh ia ki jaka jong ki paid riewlum sha ki bar Jylla la bun bun snem mynta.
Ki Pulit kila leit ban khynra ia ka Iingsah une u Mondol ba kyrteng u Nandaram Achayra (57) ha ka sngi Balang, kaba don ha ka kyntoit Brahmanpara, Tura.
Ha ka jingkhynra ia ka iingsah jong u, kila ioh ban kurup haduh 20 tylli ki kot patta kiba dei jong kiwei ki briew kiba u thmu ban die tuh sha kiba kwah thied jaka.
Ki Pulit kila shem ruh ia ki note sheet, ki file kot jaka bad wat ki map ba phiah ia ki nongkynti jong ki briew na kane ka Iingsah jong une u Nongtrei ka GHADC.
“Kane ka jingdie beain ia ki kala kala pynkamai da ki klur ia une u briew bad ia ki briew kiba iadonkti lang hynrei ngi la ioh ban kem ia kane ka kam bymman bad la ithuh ia baroh kiba donkti. Baroh ki ba donkti kin sa shah kem” ong u VS Rathore, Superintendent of Police ka West Garo Hills.
Ka buit treikam jong u Mondol bad ka kynhun jong u ka long ban pynkylla ia ki jaka ki riewlum kum ki jaka ba lah ban thied da ki briew ba na shabar. Kane ka kynhun ka ju pynshlur ia ka jingiakajia jaka da kaba shna thok ia ki kot ki sla ne shna bun tylli ki kot patta jong kajuh ka jaka ban die sha ki nongthied jaka.
Katto katne na ki briew ba donkti la ong ba ki kynthup ia kito kiba don jingiadei bad ka GHADC.
Ka GHADC kala kynton da ka mukotduma halor ki kot patta la bun bun snem namar ka jingdon jong kine ki mondol kiba la shna tuh ia bun tylli ki patta jong kawei ka jaka tang ban kamai pisa.
