Shillong, Lber 5 : Ka Tnad Meghalaya Police kala ioh kem ia uwei u ehrang barim ka kynhun kiengatiar United Achik Liberation Army (UALA) bad arngut kiwei pat, halor ka jingdonkti ban pyrshang thaw kynhun biang jong ka Garo National Liberation Army (GNLA).
Une u ehrang barim ka UALA u dei u Simsang K Marak ba 40 snem na Resubelpara, ong u Superintendent of Police ka North Garo Hills Bruna A Sangma haba iakren bad ki nongthoh khubor hynne ka sngi Ba-ar.
“U (Simsang) u dei uba la ioh song jingiarap na ka Sorkar bad u dei uba hakhmat eh ban donkti ha kane ka kam. U dei uba la thwet bha ruh da ki Pulit ka Assa. Ka Iingkashari Assam kala ai da ka MPWA pyrshah ia u bad ngin sa aiti ia u sha ki Pulit ka Assam hadien ba ngi dep pynlong ia ka jingtohkit ha North Garo Hills” ula ong.
Ki arngut kiwei pat ki dei kiba la tip kyrteng da u T Sangma (40 snem) bad u Suresh Sangma (32 snem), kiba dei na Adogre, ong une u Heh Pulit.
Ia kitei ki briew la kem halor ka ejahar bala ioh pdiang da ka Kharkutta Police Station myn ha ka 24 tarik Rymphang. Shuwa kane, kala don ruh ka jingthep jingthoh hapoh ki rynsan social media myn ha ka 7 tarik Rymphang ba ong ban thaw kynhun biang ia ka GNLA.
“Ngi la kurup ia ki mobile phone na ka met jong ki, kiba pyndonkam ha kine ki kam bymman…Kila dawa pisa ruh haduh T. 20,000 na uwei u lanot ha North Garo Hills” pyntip u Bruno.
Haba pynpaw ba ki Pulit kin sa nang kem briew ha ki sngi ban dang wan, une u SP ula ong “Ki don kumba 7-8 ngut ki dkhot ba mut thaw kynhun biang bad ngin ym map satia ia ki. Ngi la thwet ban kem ia ki”.
Haba kylli, u Bruno ula ong ba bun na ki tiar siat ba buhrieh da ka GNLA ki dei kiba la lap bad kurup ha Williamnagar ha ka por ba nga dang don ha katei ka District. “Ia mynta, ngi khlem ioh kurup tiar siat shuh” ula bynrap.
