Nongpoh, Nailar 07: Ki pulit ka Nongpoh Police Station ki la ioh kem ia u wei u briew ba la kynnoh donkti ha ki kam thok kam shukor bad kamai spah da kaba kular pyniohkam Sorkar ia ki samla pule ha ki thain Ri-Bhoi.
Ia une u briew la ioh ban kem na ka iingshongwai jong u kaba don ha Umling, Ri-Bhoi District bad la tip kyrteng ia u da u Aramus Pasam uba dei na ka shnong Puthijuri, Amjok, Karbi Anglong.
Katkum ka jingtip ba la ioh lum, ki pulit ki la kem ia u ne u briew hadien ka jing ioh jingujor na ki katto katne ngut ki samla kiba la kynnoh ba u ne u briew u la thok ia ki da kaba kular ban pynioh kam ha ki katto katne ki tnat treikam sorkar bad u la shim ruh da ka pisa kaba la kot da ki phew hajar tyngka.
La ioh jingtip ruh, ba u ne u briew u la kam ruh ba u don ka jingiadei kaba jan bha bad ki heh ki hain na ki seng sain pyrthei ka jylla, kaba pynlong ia bun ki samla ban ngop ha ki ktien jali jaum.
Ki pulit ki la pyntip ruh, ba u Aramos Pasam u la shah kem teng ha ki pulit halor kane hi kajuh ka case ha kaba u la thok ban ai kam ia ki samla bad shim ruh da ka pisa kaba la kot da ki phew hajar tyngka.
Ka Dorbar Shnong Umling ka la ujor da ka ejehar pyrshah ia u tei u briew halor kane ka kam thok kam shukor bad ki pulit ka Nongpoh PS kila register case pyrshah ia u bad ka jingtohkit kala iaid shakhmat.
Pule ruh: Pynbna ka COCOMI ban ‘boycott’ khlem pud ban iatreilang bad ka Sorkar
