Shillong, Naiwieng 08 : Ki Pulit Special Cell ka East Khasi Hills, kila ioh kem ia lai ngut ki runar jong ka kynhun ki nongrahbor ia ki nongniah kali kit jhur, ban ioh lute pisa khlem kano kano ka jingeh na ki Nongkhaii jhur.
Ia kane ka kynhun ki runar la iohkem ha ka 6 tarik Naiwieng na Mawlai By Pass, da ka jingiarap jong ki dkhot ka Meghalaya Traders Fresh Vegetable & Ginger Association lem bad ka Khasi Jaintia Fresh Vegetable Suppliers Association.
Kat kum ka jingiathuh u Superintendent of Police (City) ka East Khasi Hills Bah Vivek Syiem, ki Pulit kila ioh jingtip ia ka jingdon kane ka kynhun ki runar kiba pynbiej ia ki nongniah kali kit jhur ba kin pynkohnguh ia ki trai kali ba kin thied ia ki jhur ha ka dor kaba jem bha bad hadien kane, ki ju ialam ia kine ki nongniah kali shajan ka ISBT lane Umiam ban kit ia ki jhur.
Hynrei u ong, ba ynda poi ha kitei ki jaka, kine ki runar ki ju rahbor pynban ia ki nongniah kali sha ki jaka khlaw ba kynjah bad pynbor ia ki ba kin pyntip ia ki trai kali ba kila pynkit ia ki jhur hapoh ka kali bad ban phah noh ia ka pisa lyngba ka Google pay sha ki nongdie jhur, kiba dei hi ma ki (nongrahbor).
Une u Heh Pulit u pyntip ba da ka jingiarap ka MTFVGA bad ka KJFVSA, ka kynhun Special Cell kala pynlong ia ka jingkhynra ha ka 6 tarik bad kane ka kynhun kala ioh bat ia 3 ngut ki runar na Mawlai By Pass hadien ba kila rahbor ia uwei u nongniah trok na Lad Smit.
La iathuh ba ha kane ka jingjia ruh, kine ki runar kila pynbor ia une u nongniah ba un phone ia u trai kali ba un siew ia ka pisa bai jhur.
U Bah Vivek u pyntip ba kane ka kynhun runar kala leh ia kane ka jait kam la bunsien haba bthah ia ki briew ba la ngat ba kin wan shakhmat ha kaban ujor da ka ejahar.
U pyntip ba ka Special Cell kala thwet mynta ban iohkem ia baroh ki dkhot jong kane ka kynhun kiba dang ioh iaid laitlan.
U iathuh ba na kine ki runar, ki Pulit Special Cell kila ioh kurup ia saw tylli ki mobile phone lem bad kawei ka Maruti Swift Dzire ML05-J-3466.
Ia kine ki runar la register case hapoh ka Madanrting Police Station kat kum ka Case No. 111(11)2023 bad la pynngat ia ki hapoh ka kyndon 419/420/511/364A/384/340/34 IPC.
Pule lang ia kane: “Ioh ka Jylla haduh 63 billion cubic liter ka Um na u slap, lah pyllang tang 1 billion cubic liter” : CM
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
