Shillong, Naiwieng 08: U Nongialam ka seng BJP u Bah AL Hek ula ong ba ki don 3 ngut ki nongialam ka BJP kiba la paw kyrteng ban pan ticket ha kaban iakhun iaka elekshon Lok Sabha na Shillong Parliamentary Constituency.
“Nalor ka kyrteng ka jong nga, ki dang don sa 2 ngut ia kaba ngam pat tip iaka kyrteng jongki” ula ong.
Kat kum ka jingong jong u, ka Party kan sa peit bad bishar ba mano napdeng kitei ki 3 ngut ki kyrteng, u dei uba biang tam ban iakhun iaka elekshon Lok Sabha na Shillong” haba pyntip “Nga kubur ba ka kyrteng ka jong nga ruh kadei kawei napdeng kitei ki 3 ngut hynrei uno uno uba ioh ia ka tiket yn hap ban trei shitom ban pynthikna ba yn jop”.
Halor ka jingkylli ba ki paidbah ki kynnoh ba ka BJP kadei ka seng kaba iuhroit ia ki khristan, u Bah Hek ula ong, “Naduh ka sngi ba nga la pyniasoh bad ka BJP ha u snem 1996, ki paidbah kila kynnoh ba ka BJP kadei kaba pyrshah ia ki Kristan hynrei baroh ki seng sain pyrthei ki don beit ia kano kano ka kam ba ki leh kaba pyrshah ia kiwei”.
“Ban shu kynnoh beit thik tang ia kawei ka seng sain pyrthei ka dei ka bym shonghok satia” ula ong.
Ha kaba iadei bad ka jingjied ia ki nongkitkam kiba thymmai jong ka BJP hadien ba u Rikman Momin ula shimti kum u President bathymmai ka BJP Meghalaya, u Bah AL Hek ula iathuh ba u Rikman ula leit rah sha Delhi ia ka thup kyrteng jong ki nongialam ka BJP ban ioh iaka jingmynjur na ki nongialam kiba hakhmat duh jong ka BJP sengkmie.
“Hynne ka step nga lah ioh iakren bad u President ka BJP Meghalaya uba dang don ha ka lynti ban leit sha Delhi ban leit rah iaka thup kyrteng sha ki Nongialam ba kin ai jingmynjur” ula ong.
Pule lang ia kane: “Ioh ka Jylla haduh 63 billion cubic liter ka Um na u slap, lah pyllang tang 1 billion cubic liter” : CM
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
