Shillong, Jymmang 19 : Ki Pulit Special Cell jong ka East Khasi Hills District, kila ioh kem ia 5 ngut ki runar kiba donkti ban shoh dusmon ia ki arngut ki nongniah taxi kamai hynnin ka miet sngi Palei ha Khyndailad.
Kane ka kynhun ki Pulit kala iohkem ia kine ki runar na Guwahati da ka jingiarap ki Pulit ka Guwahati, pyntip u Superintendent of Police ka East Khasi Hills Bah Sylvester Nongtnger.
Kat kum ka jingong jong u, arngut ki Nongniah Taxi ba kynthup ia u Iohborlang Kharsohnoh na Jongsha bad u Banshai Syiem na Laitkor kila shah shoh ha ka miet sngi Palei ha Khyndailad bad kine baroh arngut kila mynsaw bad la kit sha Shillong Civil Hospital ban ai jingsumar.
Ki Pulit ka Shillong Sadar Police Station kila register case ia kane ka jingjia hapoh ka kyndon 307/324/326/34 jong ka IPC bad pynlong ia ka jingtohkit kaba bniah.
Ha ka jingtohkit, ki Pulit kila shem ba kine ki runar ba shoh ia kine ki Nongniah taxi kila phet krad sha Guwahati. Ki Pulit kila pyntip marmar sha Guwahati bad da ka jingiarap ki Pulit kane ka Nongbah ka Assam, kila ioh ban kem ia 5 ngut.
Ia kine ki 5 ngut la wan ialam noh hynne hi ka sngi sha Shillong ban pynlong ia ka jingtohkit kaba bniah.
Kane ka jingiohkem ki Pulit ia kine ki runar kala wan jia ruh tang da ki kynta hadien b aka Taxi Driver Association ka Khyndailad, kala aipor 24 kynta ia ka Tnad Pulit ban kem ia kine ki runar lem kumta kin sangeh ia ka jingkamai kali.
Halor kane ka jingshimkhia ki Pulit, ki Nongniah taxi kila rai ban pynsangeh noh ia ka jingthmu sangeh kamai.
