Shillong, Rymphang 24 : Ki Pulit ka East Khasi Hills, kila ioh ban kem ia 5 ngut ki nongtuh kali arshaka bad ioh kurup ia artylli ki thuk thuk bad kawei ka scooty.
U Superintendent of Police ka East Khasi Hills Bah Vivek Syiem u iathuh ba ki Pulit ha ka jingbuddien ia kawei ka kynhun ki nongtuh kali arshaka la katto katne taiew, ki Pulit Special Cell bad ka Sohra Police Station kila ioh ban bat ia arngut ki nongtuh thuk thuk hynnin ka miet ha Sohra Rim bad ioh kurup ia ka Suzuki Gixer Bike ML05-AD-4393 kaba tuh na Smit.
Kine ki arngut ki nongtuh ki kyrteng u Babu Marak ba 19 snem na Dalia Shella bad u Sunday N Sangma ba 30 snem ba na Samanda, East Garo Hills. Ia kane ka thuk thuk la thmu ban die sha ki briew na Bangladesh.
U Bah Vivek u iathuh ba kine ki nongtuh kila shimti ia kane ka thuk thuk ha Mawkdok na kawei pat ka kynhun Nongtuh, kiba donti ban rong tuh ia ki thuk thuk bad scooty na kylleng ki jaka ka Nongbah Shillong.
U iathuh ba ha ka jingbuddien bad jingkhynra, ki Pulit Special Cell kila ioh ban kem biang sa 3 ngut ki nongtuh kiba donkti ha kiba bun ki kam tuh thuk thuk. Ia kine ki briew la kem na kawei ka scooty ha ka thain 7mer, Upper Shillong.
Kine ki 3 ngut ki kyrteng u Barabor Namsaw ba 28 snem na Jirang, u Banroilang Iawrod ba 19 snem na Kynbahmalai, Phlangwanbroi, Mawsynram bad u Declin Warjri ba 20 snem na Nongmensong, Shillong.
Ha ka jingbteng ban talasi kali ha Sohra, ki pulit kila ioh ban bat biang sa ia kaweika thuk thuk ba shah tuh ha ka step sngi U Blei na Mawiong Umjapung kaba don u nombor R15 ML05AA 3297. Ki nongtuh kila pynieng ia kane ka thuk thuk shaneng jong ka jaka talasi ha Nongsawlia bad kila phet krad na kane ka jaka haba ieh shadien ia ka thuk thuk.
Ia kine ki nongtuh la ialam tiann bishar hapoh ka case ka Madanrting Police Station hapoh ka kyndon 303 (2) BNS.
