Shillong, Iaiong 10 : Ki Pulit ka Ri-Bhoi, kila ioh ban kem ia 5 ngut ki nong Bangladesh namar ka jingrung tuh sha India bad ak ialade kum ki nong India da kaba pyni ia ki kot ki sla ba shu shna thok kynthup ka Aadhaar Card.
Kine ki briew ki kyrteng u Sahin Akhtar (31), Mozibor Rahman (42), Prasanto Das (26), ka Suma Akhtar (27), Mamadur Rahman (32). Ia kine ki briew la ioh ban bat na kawei ka kali AS01SC-4410 ha ka por ba talasi kali hajan ka Mawtnum Petrol Pump, mar pyrshah ka Excelencia Restaurant.
Haba pan ia ki kot ki sla ban pynithuh ialade, kine ki briew kim shym la lah ban ai ia kino kino ki kot lat noh tang arngut kiba la pyni ba ki dei u Sahin Khan ba na Bommasandra, Bangaluru, Karnataa bad u Rony Khan ba na Ashok Puram, Bangalore North. Ki lai ngut kim shym la don kot don sla bad pynithuh ia lade kum u Prasanto Das, Suma Akhtar bad Mahmadul Rahman.
Ha ka jingbishar ia ki kot ki sla, ki Pulit kila shem ba ki kot ki dei kiba shu shna thok khamtam eh ka Aadhaar Card kaba kila pyni ka dei kaba khlem pynshisha da ka UIDAI, kaba pynartatien b aka Aadhaar card ka dei kaba shisha.
Halor kane ka jingshem, ia kine ki briew la rah noh sha Police Station, Nongpoh. Ha ka jingtohkit, kine ki briew kila kubur ba ki dei ki nong Bangladesh.
U Superintendent of Police ka District V Rathore ula ong “Ha ka jingtohkit, kila phla ba kila wan rung tuh sha India lyngba ka Cheragaon, Shella khlem kino kino ki kot ki sla. Kila wan rung da kaba siew mar T.16000 uwei u briew sha u nongpynrung tuh bala tip kyrteng u Hussain (Tunu Miah), uba la wan buh ia ki haduh ka surok ba ap ka kali ban kit ia ki sha Shillong, kaba don sha ka liang ka India”
Nalor kane, u iathuh ba une u nongniah kali uba kit ia kine ki nong Bangladesh sha Shillong ula phone pat ia u nongniah jong ka kali AS01-SC-4410 bad aiti ia kine ki briew ha 101 area, Upper Shillong. Kine ki nong Bangladesh kila phla ruh ba un sa don u briew uba kim tip, u ban sa shaw ia ki na Guwahati Railway Station ban pynpoi sha Tamil Nadu bad Gujarat.
Ka jingtohkit mynta kala iaid shakhmat ban lapdien ia ki briew kiba donkti ha kane ka kam bymman.
