Nongpoh, Iaiong 10: Ki Pulit ka Nongpoh Police Traffic Branch hynnin ka miet sngi Balang, ki la ioh bat ia bun tylli ki kali kiba pynkhein ia ka Motor Vehicle Act (MVA) bad ioh dain kuna ba kot jan T. 3 lak.
Tang hapoh katto katne ki kynta ba talasi kali, ki Pulit kila ioh bat ia bun tylli ki kali kiba la niah da ki briew kiba la shoh khaw-iang.
U Officer Incharge ka Nongpoh Police Traffic Branch Rubul Ali, u iathuh ba kane ka jingtalasi kali ka dei shibynta ban wan rah ia ka jingshngain ha ka leit ka wan ha ka surok NH-6 bad ban tehlakam iaki jingjia aksiden kiba wanrah ia ki jingjia ba sngewsih bad shim ia ki bun ngut ki mynsiem briew.
Ula ong ba ka jingbym burom ki nongniah kali ia ki kyndon Ain, kala wanrah ia ka jingsngewsih ha kiba bun ki longiing bad shim jyndat ia ka jingim ba tang shiteng por. Ta ka daw u ong ba ki Pulit kim banse ban mih sha surok ban talasi bad tehlakam noh ia ki jingniah kali khlem akor.
U iathuh ba ha ka jingtalasi kali ha kane ka miet, ki Pulit kila pynleit jingmut eh ia ki nongniah kiba buaid, ka jingbym biang ki kot ki sla, ka jingkit palat pud, ka jingkit siej khlem ki kyndon ka jingshngain bad kiwei kiwei. Ula iathuh ba shibun ki kali ki dei ki bym biang ia ki kot ki sla bad bun ruh la ioh bat ia ki briew ba niah kali hapdeng ka jingshoh khawiang bad bym pyndonkam ia ki seat belt, ka jingbym pyndonkam ia ki helmet haba niah kali arshaka kynthup kiba shong nadien.
Kat kum ka jingong jong u, ki Pulit Traffic kila dain kuna ia baroh ki nongniah kali ba pynkhein ain bad ka kuna kaba la ioh lum baroh kala kot ia ka T.2,99,000 (2 lak, 99 hajar tyngka).
Une u Heh Pulit u iathuh ba kane ka jingtalasi kali kan nang iai bteng haba kyntu ia ki nongniah kali ba ki dei ban burom noh ia ki kyndon ain ka MVA khnang ba kan shngain ka leit ka wan ha ki surok.
 bad ioh dain kuna ba kot jan T. 3 lak.){kind=link}