Shillong, Risaw 14 : Ki Pulit ka Mawryngkneng Police Station, ha ka miet sngi Nyngkong, kila ioh kem ia 4 ngut ki nongtuh thuk thuk ba kynthup ia arngut ki Khynnah bad ioh kurup ia kawei ka thuk thuk Royal Enfield lem bad ka Maruti Alto ba ki pyndonkam ha kane ka kam bymman.
Kine ki 4 ngut ki kyrteng u Kleston Gympad ba 32 snem bad u Behelden Khyriem ba 20 snem lem bad arngut ki Khynnah kiba dei na ka shnong Amlari Model, West Jaintia Hills.
Ia kine ki nongtuh la ioh bat hadien ka jingphet krad na ka jingtalasi kali arshaka jong ki Pulit ka Mawryngkneng ha ka jaka bala tip kum ka Mawryngkneng-Kynroh Maram. Kane kala jia ha ka por 10:30 baje mynmiet.
Kat kum ka jingiathuh u Superintendent of Police ka East Khasi Hills Bah Vivek Syiem, la ong baha kane ka jingtalasi kali arshaka, kawei ka thuk thuk kala kyntait ban sangeh bad kala pynher sted pynban, kaba pynlong ia ki Pulit ban beh kthong hynrei hadien katto katne por la lap ia kane ka thuk thuk Royal Enfield (AS01-FY-0871) bala shu ieh ha ka shnong Mookyndur, West Jaintia Hills.
U iathuh ba ki Pulit kila pynlong ia ka jingkhynra ha ka thain bad kila ioh kem ia kine ki 4 ngut ki runar. La iathuh ba kine ki 4 ngut ki dei ki briew kiba thmu ban pdiang ia kane ka thuk thuk kaba shu tuh.
Ki Pulitka Mawryngkneng kila kurup noh ia kane ka thuk thuk bad kumjuh ruh ia ka Maruti Alto ML04-D-4797 kaba la pyn donkam da kine ki 4 ngut ha kane ka kam bymman.
U Bah Vivek u iathuh ba ia kane ka thuk thuk Royal Enfield la tuh na Guwahati Pan Bazaar bad yn sa aiti noh sha ki Pulit ka Guwahati.
Ki Pulit kila register case halor kane ka jingjia bad ka jingtohkit mynta kala iaid shakhmat.
